[prenta uppsett í dálka] 27. fundur, 125. lþ.
Ísólfur Gylfi Pálmason (andsvar):
Herra forseti. Þetta var um margt athyglisverð ræða hjá hv. þm. Kristjáni L. Möller. Ég veit að Kristján L. Möller er vel hugsandi maður í byggðamálum og fleiru. En ræða hv. þm. byggðist á þessu: Það hefði verið gott.
Af því ég veit að hann er gamall íþróttamaður þá segja menn gjarnan ef þeir eru að tapa leikjum: Það hefði verið gott að gera þetta svona og hinsegin. Ef ég hefði ekki misstigið mig þá hefði ég skorað o.s.frv. Öll rökin hjá hv. þm. voru þau: Það hefði verið gott.
Hins vegar spyr ég hv. þm.: Ætlar hann að tefja þetta mál með því að láta málið fara í lögformlegt umhverfismat? Er hann tilbúinn að tefja það í tvö ár og missa þannig kannski þetta marktækifæri?
