Ferill 222. máls. Aðrar útgáfur af skjalinu: PDF - Word Perfect.
125. löggjafarþing 1999–2000.
Þskj. 460 — 222. mál.
Svar
fjármálaráðherra við fyrirspurn Bergljótar Halldórsdóttur um skattlagningu í sjávarútvegi.
1. Hve mikið hafa fyrirtæki í sjávarútvegi, í fiskveiðum og fiskvinnslu, greitt í skatta undanfarin fimm ár? Óskað er eftir sundurliðun eftir árum og tegund skatta, þ.e. tekjuskatti, útsvari, tryggingagjaldi, eignarskatti og skatti af söluhagnaði eigna.
Í meðfylgjandi töflu eru tiltækar upplýsingar um tekjuskatt, eignarskatt og tryggingagjald fyrirtækja í sjávarútvegi. Um er að ræða álagningu 1995–99 vegna tekjuáranna 1994–98. Hinar tilgreindu fjárhæðir eru álögð gjöld en ekki greidd. Í einhverjum tilvikum getur verið um áætlun að ræða. Yfirlitið nær ekki til aðila sem hafa milligöngu um sölu sjávarafurða og aðeins til lögaðila en ekki einstaklinga með rekstur í eigin nafni. Skattur af söluhagnaði eigna er innifalinn í framangreindum tölum þar sem söluhagnaður er ekki sérgreindur skattstofn en kemur til skattlagningar með öðrum tekjum.
|
Tekjuár |
Framtal |
Tekjuskattur, millj. kr. |
Eignarskattur, millj. kr. |
Sérstakur eignarskattur, millj. kr. | Tryggingagjald, millj. kr. |
| 1994 | 1995 | 148 | 93 | 19 | 858 |
| 1995 | 1996 | 272 | 119 | 25 | 919 |
| 1996 | 1997 | 276 | 127 | 27 | 1.218 |
| 1997 | 1998 | 472 | 157 | 33 | 1.320 |
| 1998 | 1999 | 603 | 152 | 32 | 1.640 |
2. Hve miklir skattar hafa verið greiddir í sjávarútvegi af söluhagnaði veiðiheimilda síðustu fimm ár, sundurliðað eftir árum?
3. Hve miklar fyrningar af veiðiheimildum hafa verið taldar fram af fyrirtækjum í sjávarútvegi síðustu fimm ár, sundurliðað eftir árum?
Til svars við 2. og 3. lið fyrirspurnarinnar skal bent á að söluhagnaður og fyrningar af veiðiheimildum eru ekki skráðar sérstaklega í skattskilum lögaðila og því ekki unnt að veita umbeðnar upplýsingar.