Ferill 626. máls. Aðrar útgáfur af skjalinu: PDF - Word Perfect.
125. löggjafarþing 1999–2000.
Þskj. 1155 — 626. mál.
Svar
sjávarútvegsráðherra við fyrirspurn Kristjáns Pálssonar um aflahlutdeildarkerfi við loðnuveiðar.
Fyrirspurnin hljóðar svo:
1. Hvenær var aflahlutdeild, þ.e. úthlutun á leyfðum hámarksafla skips, tekin upp í loðnuveiðum við Ísland?
2. Hvaða reglur giltu við upphaflegu úthlutunina?
3. Hvaða breytingar hafa verið gerðar á úthlutunarreglum síðan?
Samkomulag var gert milli Íslands og Noregs í júní 1980 um fiskveiði- og landgrunnsmál. Í því var m.a. kveðið á um skiptingu landanna á leyfilegri heildarveiði úr loðnustofninum á hafsvæðinu milli Íslands, Grænlands og Jan Mayen. Ákveðið var að skipta hlut Íslands milli skipa sem þá stunduðu loðnuveiðar. Var 50% skipt jafnt milli skipanna en 50% á grundvelli burðargetu þeirra. Tók þetta fyrirkomulag við stjórn veiðanna gildi fyrir upphaf loðnuvertíðarinnar 1980/1981.
Fyrir loðnuvertíðina 1985/1986 lagði stjórn LÍÚ til að skiptingunni yrði breytt þannig að 67% hlutum yrði skipt jafnt en 33% á grundvelli burðargetu. Var orðið við því.
Ekki voru frekari breytingar gerðar á skipan þessara mála fyrir gildistöku laga nr. 38/1990, um stjórn fiskveiða, 1. janúar 1991. Með þeim var aflahlutdeild einstakra skipa í loðnu lögbundin. Segir í 1. mgr. ákvæðis IV til bráðabirgða við lögin: „Aflahlutdeild til veiða á loðnu, síld og humri skal úthlutað á grundvelli hlutdeildar viðkomandi skips í heildarúthlutun á því veiðitímabili eða vertíð er síðast lauk áður en lög þessi koma til framkvæmda.“ Ekki hafa verið gerðar breytingar á úthlutun aflahlutdeilda í loðnu frá gildistöku laganna.
