Ferill 616. máls. Aðrar útgáfur af skjalinu: PDF - Word Perfect.

---

125. löggjafarþing 1999–2000.
Þskj. 1366  —  616. mál.

Svar

félagsmálaráðherra við fyrirspurn Rannveigar Guðmundsdóttur um umönnunargreiðslur og greiðslur til stuðningsfjölskyldna.

    Fyrirspurnin hljóðar svo:
     Hvernig hafa greiðslur til stuðningsfjölskyldna fatlaðra barna annars vegar og umönnunargreiðslur vegna fatlaðra og langveikra barna hins vegar þróast frá 1. janúar 1994 sem hlutfall af meðallaunum verkamanna samkvæmt gögnum kjarasamninga, sundurliðað eftir árum?

    Efni fyrirspurnarinnar heyrir undir tvö ráðuneyti, félagsmálaráðuneyti og heilbrigðis- og tryggingamálaráðuneyti. Að höfðu samráði við heilbrigðisráðherra er fyrirspurninni í heild svarað af félagsmálaráðherra.
    Upplýsinga var aflað frá kjararannsóknarnefnd um þróun meðallauna verkamanna frá 1. janúar 1994 og ná þær til þriðja ársfjórðungs 1999. Jafnframt var upplýsinga aflað um fjárhæðir umönnunarbóta og umönnunargreiðslna vegna fatlaðra og langveikra barna frá Tryggingastofnun ríkisins.

Greiðslur til stuðningsfjölskyldna.

Tímabil	Ársfjórðungur	Meðallaun verkafólks í dagvinnu	Lágmarkslaun með eingr. og láglaunabótum	Greiðslur til stuðningsfjölskyldna	Hlutfall af meðal- launum
1994	1.	75.100	43.116	2.434	3,2%
1995	1.	76.900	44.711	2.434	3,2%
	2.	78.700	52.365	5.999	7,6%
	4.	80.400	52.365	6.070	7,5%
1996	1.	84.500	49.538	6.340	7,5%
1997	1.	86.200	53.837	6.340	7,4%
	2.	91.900	60.961	6.638	7,2%
1998	1.	96.900	70.000	6.903	7,1%
1999	1.	111.200	70.000	6.903	6,2%
	2.	105.000	70.000
	3.	107.100	70.000
2000	1.			6.903
	2.			8.300

    Á tímabilinu sem spurt er um hafa verið í gildi tvær reglugerðir um þjónustu stuðningsfjölskyldna. Með reglugerð nr. 155/1995, um þjónustu við fötluð börn og fjölskyldur fatlaðra, sem tók gildi í mars 1995 var sú breyting gerð að miða greiðslur til stuðningsfjölskyldna við fötlun og umönnunarþörf þeirra barna sem stuðningsfjölskyldurnar tóku í umsjá sína. Fram til þess tíma var ekki um að ræða stigskiptar greiðslur eftir fötlun og umönnunarþörf. Í töflunni eru upplýsingar um þróun hámarksgreiðslna til stuðningsfjölskyldna fyrir hvern sólarhring sem þær hafa haft fatlað barn í umsjá sinni og hlutfall þeirra greiðslna af meðallaunum verkafólks í dagvinnu.
    Greiðslur til stuðningsfjölskyldna hafa til þessa verið ákveðið hlutfall af launaflokki BSRB. Ýmis vandkvæði hafa fylgt því, einkum vegna breytinga á númerum og heitum launaflokka. Með reglugerð sem félagsmálaráðherra hefur samþykkt og mun öðlast gildi 1. júní 2000 hefur verið ákveðið að breyta fyrirkomulaginu og taka greiðslurnar til endurskoðunar við afgreiðslu fjárlaga ár hvert með tilliti til þróunar launa. Samkvæmt framangreindri reglugerð munu hámarksgreiðslur til stuðningsfjölskyldna verða 8.300 kr. fyrir hvern sólarhring frá og með 1. júní 2000.

Umönnunarbætur og umönnunargreiðslur.

Tímabil	Ársfjórðungur	Meðallaun verkafólks í dagvinnu	Lágmarkslaun með eingr. og láglaunabótum	Umönnunarbætur	Hlutfall af meðallaunum	Umönnunargreiðslur	Hlutfall af meðallaunum
1994	1.	75.100	43.116	47.912	63,8%
1995	1.	76.900	44.711	47.912	62,3%
	2.	78.700	52.365	50.212	63,8%
1996	1.	84.500	49.538	50.212	59,4%
1997	1.	86.200	53.837	51.216	59,4%
	2.	91.900	60.961	53.265	58,0%
	3.	92.400	60.961	54.597	59,1%
	4.	92.700	60.961			61.903	66,8%
1998	1.	96.900	70.000			63.537	65,6%
1999	1.	111.200	70.000			66.078	59,4%
	2.	105.000	70.000			67.179	64,0%
	3.	107.100	70.000
2000	1.					70.224
	2.

    Á tímabilinu sem spurt er um hafa verið í gildi tvær reglugerðir um fjárhagslega aðstoð við framfærendur fatlaðra og langveikra barna. Umönnunarbætur voru greiddar samkvæmt reglugerð nr. 150/1992, um fjárhagslega aðstoð við framfærendur fatlaðra og sjúkra barna. Frá 1. september 1997 hafa verið greiddar umönnunargreiðslur samkvæmt reglugerð nr. 504/ 1997, um fjárhagslega aðstoð við framfærendur fatlaðra og langveikra barna. Í töflunni er sýnd þróun hámarksgreiðslna samkvæmt þessum reglugerðum og hlutfall þeirra af meðallaunum verkafólks í dagvinnu.