[prenta uppsett í dálka] 84. fundur, 126. lþ.
Þuríður Backman:
Herra forseti. Ég þakka fyrir þessa fyrirspurn. Á þessum tíma er eins og fram hefur komið, gott að ræða þetta hér í rólegheitunum. Mér finnst vera mikill munur á því, herra forseti, hvort við erum að tala um að sameina áfengis- og vímuvarnaráð og tóbaksvarnanefnd í eitt forvarnaráð, eða hvort við erum að tala um að efla starf þessara nefnda með því að finna þeim samastað í forvarnastöð, þ.e. undir sama þaki.
Það er nú þannig að tóbakið er ekki forgangsverkefni þegar við erum að tala um vímu- og fíkniefnavarnir, það lendir fyrir aftan sterku, ólöglegu efnin, jafnvel fyrir aftan áfengið. Ég óttast því að ef þetta yrði allt sett í einn pakka þá yrði forgangsröðin áfram sú sama og að þessar 40 eyrnamerktu milljónir, sem nú fara í mjög víðfeðmar tóbaksvarnir, mundu ekki nýtast til tóbaksvarna.
