Ferill 717. máls. Aðrar útgáfur af skjalinu: Word Perfect.
126. löggjafarþing 2000–2001.
Þskj. 1179 — 717. mál.
Svar
heilbrigðisráðherra við fyrirspurn Sigríðar Jóhannesdóttur um nýgengi krabbameins á Suðurnesjum.
Fyrirspurnin hljóðar svo:
Hvert hefur verið nýgengi krabbameins á Suðurnesjum undanfarna áratugi samanborið við aðra landshluta?
Samanburður var gerður á aldursstöðluðu nýgengi, miðað við alþjóðlegan staðal. Skoðað var árlegt nýgengi, nýgengi í þriggja ára tímabilum svo og allt tímabilið.
Tímabil sem notað var í samanburðinum var 1991–1999. Val á tímabili miðaðist við fyrirliggjandi mannfjöldatölur á Suðurnesjunum fengnum frá Hagstofunni.
Borið var saman nýgengi fyrir eftirfarandi mein:
Öll krabbamein hjá körlum og konum.
Blöðruhálskirtilskrabbamein hjá körlum.
Brjóst hjá konum.
Lungnakrabbamein hjá körlum og konum.
Blöðruhálskirtilskrabbamein er algengasta krabbamein karla, brjóstakrabbamein algengasta krabbamein kvenna og lungnakrabbamein er í öðru sæti hjá báðum kynjum.
Að neðan má sjá árlegan meðalfjölda þeirra sem greindust með krabbamein á umræddu tímabili (1991–1999) svo og mannfjöldatölur:
Meðalfjöldi greindra á ári |
Mannfjöldi
–
meðaltal á ári |
|||||||
karlar | konur | karlar | konur | |||||
Suðurnes | 23 | 26 | 8.027 | 7.631 | ||||
Allt landið | 502 | 488 | 134.058 | 133.058 |
Ekki var hægt að greina mun á nýgengi krabbameins í körlum á Suðurnesjum og á landinu öllu. Gilti það bæði um nýgengi allra meina, krabbameins í blöðruhálskirtli og lungnakrabbamein. Sama niðurstaða fékkst fyrir nýgengi brjóstakrabbameins í konum.
Nýgengi allra krabbameina hjá konum var heldur hærra á Suðurnesjunum miðað við landið allt, þegar skoðuð voru þriggja ára tímabil. Ef skoðuð eru einstök ár eru Suðurnesin með hærra nýgengi í 2/ 3 tilfella. Hærra nýgengi Suðurnesjakvenna miðað við landið allt var þó langt frá því að vera marktækt.
Nýgengi lungnakrabbameins í konum á Suðurnesjunum var nokkru hærra öll árin, miðað við nýgengi lungnakrabbameins á öllu landinu, þó ekki reyndist um marktækan mun að ræða, nema þegar öll 9 árin voru skoðuð saman. Á Suðurnesjunum hefur tilfellum fækkað meira síðustu árin heldur en á öllu landinu.
Fjöldi kvenna sem greindust með lungnakrabbamein | ||||
Suðurnes | Landið allt | |||
1991–1993 | 16 | 159 | ||
1994–1996 | 13 | 169 | ||
1997–1999 | 9 | 134 |
Niðurstaða: Ekki er hægt að fullyrða að fleiri greinist með krabbamein á Suðurnesjunum en í öðrum landshlutum, en þó er tilhneiging hjá konum í þá veru og á það sérstaklega við um lungnakrabbamein.