[prenta uppsett í dálka] 62. fundur, 127. lþ.
Flm. (Ögmundur Jónasson) (andsvar):
Herra forseti. Ég tel velferðarmálin mjög mikilvæg og ekkert síður mikilvæg en byggðamálin í sjálfu sér. Reyndar tel ég þetta tvennt vera mjög samofið. Forsenda byggðar er einmitt traust velferðarþjónusta og ég hef litið svo á og við gerum það í þingflokki Vinstri hreyfingarinnar -- græns framboðs að velferðarmál séu byggðamál. Ég er ekki í nokkrum vafa um að þau kæmu mjög við sögu á slíku byggðaþingi. Þar kæmi einkavæðingin líka við sögu. Það skiptir máli fyrir byggð í landinu að hún og byggðarlögin og fólk sem býr á landsbyggðinni búi við trausta velferðarþjónustu og gott stoðkerfi. Við lítum reyndar svo á að þetta sé forsenda heilbrigðrar og góðrar byggðaþróunar.
