[prenta uppsett í dálka] 62. fundur, 127. lþ.
Þuríður Backman:
Herra forseti. Ég vil fyrir hönd þingflokks míns, Vinstri hreyfingarinnar -- græns framboðs, lýsa fullum stuðningi við þáltill. Við teljum mikilvægt að hún fái góða afgreiðslu og það á þessu þingi. Dregist hefur úr hömlu að semja verndaráætlun um nýtingu íslensku Ramsar-svæðanna. Það er staðreynd að eingöngu hafa verið tilnefnd þrjú svæði. Við eigum að klára þá vinnu. Við eigum að setja metnað okkar í að gera þessa áætlun og fylgja því eftir sem í áætluninni felst, þ.e. að fara í rannsóknir og skráningu. Að öllum líkindum mun slík vinna skila okkur í fyrsta lagi bættri umgengni við náttúruna og í öðru lagi aukinni vitund um verndargildi náttúrunnar og aukinni ferðaþjónustu og arðsemi henni tengdri.
