[prenta uppsett í dálka] 70. fundur, 127. lþ.
Iðnaðarráðherra (Valgerður Sverrisdóttir):
Hæstv. forseti. Ég sé að hv. þingmenn Vinstri grænna hafa farið í mikla söguskoðun. Miðað við það að ég hafi sagt í desember að byggðaáætlun kæmi á næstu vikum þá sýnist mér að ég geti enn staðið við það því hún kemur svo sannarlega á næstu dögum og því ekki eru liðnar margar vikur frá því í desember.
Ég ætla að gleðja hv. þm. með því, ef þeir hafa ekki orðið varir við það í fréttaflutningi í dag, að stærsta byggðamálið er að koma inn í þingið, sem er Kárahnjúkavirkjun, núna alveg á næstu dögum. Ég vænti þess að þeir taki vel undir það mál þar sem það mun verða til þess að fólki fjölgar mjög á Austurlandi. (SJS: Og Vestfjörðum?) Ég veit að það eru rök þeirra í því máli að það fjölgi ekki fólki á Vestfjörðum, en horft er fram hjá því að fólki mun fjölga um þúsundir á Austurlandi. Ég vonast til þess að ég eigi stuðning þeirra í því mikilvæga byggðamáli.
