[prenta uppsett í dálka] 92. fundur, 127. lþ.
Drífa Hjartardóttir (andsvar):
Herra forseti. Hvað varðar landgræðsluáætlunina er ákveðin aðferðafræði tíunduð hér. Aðalatriðin eru náttúrlega að stöðva hraðfara jarðvegseyðingu sem er allt of mikil, gróðurvernd, stjórn landnýtingar, uppgræðsla lands, einkum á láglendi, hefting landbrots, upplýsingaöflun, rannsóknir, þróun, fræðsla og ráðgjöf. Í þessari áætlun er líka rætt um að halda áfram þeim mikilvægu verkefnum sem hafa verið unnin í samstarfi við íslenska bændur sem skiptir ekki litlu máli. Það eru verkefni sem heita ,,Betri bú`` og ,,Bændur græða landið``. Ég tel þau mjög mikilvæg og sérstaklega góð fyrir samstarf bænda og Landgræðslunnar þar sem þetta starf styrkir bændurna í heimasveit þeirra.
