Gísli S. Einarsson:
Virðulegur forseti. Allt ber að sama brunni. Allt fer á sömu lund. Stefnan er óbreytt, samdráttarstaðirnir visna, markaðsstaðirnir eflast. Þetta segi ég með vísan til skýrslu Þjóðhagsstofnunar um stjórn fiskveiða.
Mannleg stjórn fiskveiða við Ísland er á villigötum. Menn sitja fastir í hinu mannlega þorskaneti, þ.e. fiskveiðistjórnarkerfinu sem er orðið afskræmi og óhugnaður ógeðfelldrar gróðahyggju sem vex eins og slímug forynja og bólgnar út á einum stað um leið og reynt er að setja á hana bönd á öðrum.
Herra forseti. Ég hef áður sagt og segi enn: Fiskveiðistjórnarkerfið felur í sér allt sem er andstætt þeim gildum sanngirni og réttlætis sem ég þekki. Því hafna ég þessu máli.