Drífa Hjartardóttir:
Herra forseti. Talið er að Ísland hafi verið skógi vaxið milli fjalls og fjöru hér áður fyrr, eða það lærðum við í Íslandssögunni. Við höfum tapað þeim skógi í miklum mæli og erum nú að reyna að endurheimta hann. Ég tel að skógræktarverkefnin sem eru vítt og breitt um landið hafi verið eitt af því besta sem hefur gerst í sveitum landsins á síðustu árum. Verið er að breyta eyðisöndum í fallega skógarreiti með auknu og fjölbreyttu dýra-, skordýra- og plöntulífi öllum til yndisauka. Það er alveg ótrúlegt að heyra hér í þessum sal talað um að skógrækt á Íslandi sé að ógna fuglalífi.