Össur Skarphéðinsson (andsvar):
Herra forseti. Ég ítreka það sem ég sagði áðan að það er ekkert í skoðun okkar sem bendir til að sá háttur sem við ræðum um mundi stangast í einhverju á við þá stefnu sem Evrópusambandið hefur núna. Við miðum auðvitað okkar samningskröfur við þá stefnu sem þarna er uppi og við viljum að það verði gert á grundvelli þessarar hlutfallsreglu. Það er alveg ljóst.
Við höfum síðan í ákaflega löngu máli, sem hv. þm. getur lesið í þessari bók, sett fram ákveðin samningsmarkmið sem koma einmitt í veg fyrir að útlendingar geti náð tangarhaldi hér á auðlindinni. Ég bendi t.d. á ákveðin lög sem sett hafa verið í Bretlandi sem Evrópusambandið hefur fallist á og koma í veg fyrir að útgerð í öðru landi geti komið inn og keypt sér veiðiheimildir beinlínis til þess að misnota þær í þeim tilgangi sem mér skildist á máli hv. þm.