[prenta uppsett í dálka] 40. fundur, 127. lþ.
Ögmundur Jónasson (andsvar):
Herra forseti. Það er rétt hjá hv. þm. að ég tel að það eigi að reyna að þróa Sameinuðu þjóðirnar og þau tæki sem þær búa yfir í þessu veru þannig að þær geti beitt sér á alþjóðavettvangi og geri það með lýðræðislegu aðhaldi. Mér finnst það rangt, skaðlegt og hættulegt að Bandaríkjamenn hafi sjálfdæmi um lögregluaðgerðir í heiminum og dæmin sanna að þau hafa fyrst og fremst verið að þjóna sínum eigin hagsmunum.
Það sem ég var að koma inn á þegar ég vitnaði í vináttu þeirra við talibana fyrr á tíð er að Bandaríkjamenn hafa haft á sínu framfæri hryðjuverkamenn og hryðjuverkastjórnir um langt árabil. Um langt árabil studdu Bandaríkjamenn Saddam Hussein. Á þeim tíma beitti hann efnavopnum gegn Kúrdum og gegn Írönum svo aðeins eitt dæmi sé tekið og það var á þeirra vegum sem Osama bin Laden og félagar hans í talibanahreyfingunni fjármögnuðu starfsemi sína.
