[prenta uppsett í dálka] 29. fundur, 128. lþ.
Össur Skarphéðinsson:
Herra forseti. Ég er sammála hv. þm. Hjálmar Árnasyni um að fjöldatakmarkanir séu ekki lengur í takt við tímann. Ég er og hef jafnan verið þeirrar skoðunar að fjöldatakmörkunum hafi fyrst og fremst verið beitt að undirlagi viðkomandi stétta. Ég barðist, sem formaður stúdentaráðs Háskóla Íslands á sínum tíma, harkalega gegn því að það væru við lýði fjöldatakmarkanir í læknadeild. Það hefur komið í ljós að þær röksemdir sem hafðar voru uppi gagnvart fjöldatakmörkunum í tannlæknadeild og í læknadeild Háskóla Íslands, þ.e. möguleikinn til verklegrar kennslu, stóðust ekki. Í báðum þessum tilvikum, a.m.k. varðandi læknadeildina, var aukið við án þess að maður sæi nokkrar breytingar á möguleikum til verklegrar kennslu.
Ég skora á hæstv. menntmrh. að taka til endurskoðunar þessa kreddukenndu afstöðu sem mér fannst hann hafa til hlutverks háskóla og sjálfstæðis háskóla.
