Aðrar útgáfur af skjalinu: PDF - Word Perfect. Ferill 412. máls.
128. löggjafarþing 2002–2003.
Þskj. 518  —  412. mál.




Frumvarp til laga



um breytingu á lögum um málefni aldraðra, nr. 125/1999, með síðari breytingum.

(Lagt fyrir Alþingi á 128. löggjafarþingi 2002–2003.)



1. gr.

    Í stað fjárhæðarinnar „4.826 kr.“ í 2. málsl. 1. mgr. 10. gr. laganna kemur: 5.440 kr.

2. gr.

    Lög þessi öðlast þegar gildi og koma til framkvæmda við álagningu opinberra gjalda á árinu 2003 vegna tekna ársins 2002.

Athugasemdir við lagafrumvarp þetta.


    Í frumvarpinu er lagt til að gjald í Framkvæmdasjóð aldraðra sé hækkað um 614 kr. eða um 12,73%. Af þeirri hækkun eru 500 kr. eða 10,36% vegna sérstaks átaks í uppbyggingu öldrunarstofnana og viðhalds þeirra og 114 kr. eða 2,37% eru vegna hækkunar að hálfu á byggingarvísitölu og að hálfu á neysluvísitölu.



Fylgiskjal.


Fjármálaráðuneyti,
fjárlagaskrifstofa:


Umsögn um frumvarp til laga um breytingu á lögum um málefni aldraðra,
nr. 125/1999, með síðari breytingum.

    Með frumvarpinu er lagt til að sérstakt gjald sem skattstjórar leggja á þá sem skattskyldir eru skv. 1. gr. laga nr. 75/1981, um tekjuskatt og eignarskatt, og renna skal í Framkvæmdasjóð aldraðra skuli nema 5.440 kr. á hvern gjaldanda í stað 4.826 kr. í gildandi lögum. Ef miðað er við 163.000 gjaldendur á árinu 2003 hækka ríkistekjur frá fjárlögum þessa árs um 123 m.kr. sem renna til Framkvæmdasjóðs aldraðra verði frumvarpið að lögum.