Guðjón A. Kristjánsson:
Hæstv. forseti. Menn telja að hér sé byggðaáætlun í gangi. Hæstv. ráðherra lýsti því að markvisst væri unnið eftir henni.
Það er rétt sem nokkrir hv. þingmenn hafa vikið að, að haldinn var sérstakur fundur vestur á Ísafirði þar sem sveitarstjórnarmenn óskuðu alveg sérstaklega eftir því að þingmenn Norðvest. mættu vegna þess að þar væri samfelldur samdráttur í opinberum störfum og ekki horfur á öðru en að þjónustustörfum mundi halda áfram að fækka. Í raun virðist hin markvissa byggðastefna felast í því að fækka störfum frekar en hitt.
Virðulegi forseti. Við höfum yfirleitt haldið því á lofti hér á þingi að það bæri að reyna að byggja upp það sem byggðirnar kynnu best. Út frá því ganga Vestfirðingar í sinni sérstöku byggðaáætlun, að sjávarútvegurinn sé besta undirstaðan sem menn geti þar byggt á. En því miður hefur þróunin verið í allt aðra átt í klóm hins slæma kvótakerfis.