[prenta uppsett í dálka] 115. fundur, 130. lþ.
Helgi Hjörvar:
Virðulegur forseti. Ég vísa því algerlega á bug sem hv. þm. Einar K. Guðfinnsson hélt fram. Ég tók það sérstaklega fram að ég færi ekki í efnislega umræðu að fjarstöddum hæstv. forsrh. og að ég vildi gefa honum tækifæri til að koma hingað og svara þeim spurningum sem hér hafa risið. Ég tel hins vegar ekki rétt að kalla þessar fréttir hviksögur, og tel að hv. þm. Einar K. Guðfinnsson verði að hafa það í huga að sá blaðamaður sem þessar fréttir færir hefur áður reynst hafa giska góðar heimildir um mál sem snertu þennan sal og hluti í þessum sal á vegum þingmanna, hluti sem voru ekki eins og þeir áttu að vera. Það er full ástæða til að leggja við eyrun þegar sá ágæti blaðamaður telur að hér hafi eitthvað misjafnt farið fram og ganga úr skugga um hvort það er rétt. Hingað til hafa heimildir hans reynst nokkuð traustar um misfellur í störfum þingsins, eða einstakra þingmanna öllu heldur.
