Fjármálaráðherra (Geir H. Haarde):
Virðulegi forseti. Ekki veit ég hver er hænan og hvert er eggið í þessu máli en (Gripið fram í: Ha?) auðvitað er fjarri því að hér sé verið að efna til einhvers stríðs eða stórátaka eins og hv. þm. gefur í skyn. Vefrit fjmrn. sem kemur út vikulega og er nú stundum fyrst með fréttirnar, eins og sagt er, birtir í dag upprifjun á því sem Ríkisendurskoðun hefur sjálf sagt í fyrri skýrslum sínum um hina svokölluðu rammafjárlagagerð. Við það er ekkert að athuga. Og það er sett í samhengi við ummæli ríkisendurskoðanda í nýlegu bréfi sem hv. þm. vitnaði til. Hvað er athugavert við það? Ekki nokkur skapaður hlutur þannig að vefritið stendur við það sem þar er sagt.