Aðrar útgáfur af skjalinu: PDF - Word Perfect. Ferill 610. máls.
130. löggjafarþing 2003–2004.
Þskj. 1406  —  610. mál.



Svar



menntamálaráðherra við fyrirspurn Björgvins G. Sigurðssonar um brottfall úr framhaldsskólum.

    Fyrirspurnin hljóðar svo:
    Hvert var brottfall úr íslenskum framhaldsskólum á síðasta ári
     a.      sundurliðað eftir kynjum og skólum á vorönn og á haustönn, og
     b.      sundurliðað eftir bóknámi og verknámi?

    Brottfall má skilgreina á marga vegu. Þær tölfræðiupplýsingar sem hér eru lagðar fram sýna hlutfall þeirra nemenda sem hurfu frá námi milli skólaáranna 2002 og 2003. Um er að ræða um 15% nemenda en hlutfallstölur fyrir einstaka skóla eru mjög mismunandi, allt frá því að vera engar eða mjög lágar upp í mjög hátt hlutfall. Hér er einungis um að ræða eina leið til að skilgreina brottfall.
    Sveigjanlegt og opið skólakerfi hér á landi gerir nemendum kleift að hverfa tímabundið frá námi. Nemendur vita að skólinn stendur þeim opinn ef þeir kjósa að snúa sér að námi á nýjan leik. Oft er um að ræða nemendur sem af eðlilegum ástæðum kjósa að hverfa frá námi. Nemendum er ljóst að þeir eiga þess kost að fá skólavist aftur þegar þeir sjá ljósari tilgang með náminu eða aðstæður þeirra eru af einhverjum ástæðum betri. Hæpið er að telja alla þá nemendur sem gera hlé á námi sínu hér á landi brottfallsnemendur, enda ljóst að margir þessara nemenda hefja nám að nýju. Síðustu ár hefur t.d. mátt greina hlutfallslega fjölgun nemenda í eldri aldurshópum við nám í framhaldsskólum, sérstaklega í aldurshópnum 20–24 ára en einnig í hópi allra eldri en 20 ára. Það er í raun staðfesting þess sem áður er sagt að
brottfall úr námi er oft og tíðum tímabundið.
    Ljóst er að atvinnuástand hefur bein áhrif á sókn í skóla. Hér á landi hefur eftirspurn eftir vinnuafli verið mikil á undanförnum árum. Aðstæður á vinnumarkaði víða erlendis eru hins vegar ólíkar aðstæðum hér á landi. Langvarandi mikið atvinnuleysi í mörgum Evrópulöndum veldur því að stjórnvöld reka þá stefnu að halda nemendum í skóla eins lengi og unnt er enda hafa nemendur enga möguleika á að fá vinnu. Samanburður milli landa um brottfall getur því verið varasamur.
    Eftirfarandi tölfræðiupplýsingar um brottfall eru unnar af Hagstofu Íslands. Þær miðast við brottfall frá hausti 2002 til haustsins 2003 (sjá nánar um vinnuaðferð og skilgreiningu hér á eftir). Þar sem gagnaöflun Hagstofu Íslands um nemendafjölda í framhaldsskólum miðast einungis við fjölda nemenda um miðjan október ár hvert er ekki unnt að greina brottfall eftir önnum.

Brottfall úr framhaldsskólum 2002–2003.
Vinnuaðferð og skilgreining:
    Taldir eru saman nemendur í dagskóla á framhaldsskólastigi (sjá aftar) um miðjan október 2002 samkvæmt nemendaskrá Hagstofu Íslands og þeir bornir saman við skráða nemendur í öllum skólum (framhaldsskólum, háskólum, sérskólum og tónlistarskólum) um miðjan október 2003. Nemendur haustið 2002 sem ekki eru í námi haustið 2003 voru bornir saman við útskrifaðar nemendur í öllum skólum frá 1.12.2002 til hausts 2003 samkvæmt prófaskrá Hagstofu Íslands. Þeir nemendur sem hvorki hafa útskrifast á þessu tímabili né koma fram í nemendaskrá haustið 2003 teljast vera brottfallnir þetta ár.

Heildarbrottfall.
Fjöldi nemenda haustið 2002 18.250
Nemendur haustið 2002 sem ekki koma fram í neinum skóla á framhaldsskólastigi og háskólastigi haustið 2003
4.504
Þar af brautskráðir frá 1.12.2002 til hausts 2003 1.747
Brottfallnir nemendur frá hausti 2002 2.757
Brottfall í % 15,1

Brottfallnir eftir kyni.
Kyn Nem. 2002 Brottfall, fjöldi Brottfall %
Karlar 9.049 1.547 17,1
Konur 9.201 1.210 13,2
Alls 18.250 2.757 15,1
Brottfallnir eftir flokkun náms.
Flokkun Nem. 2002 Brottfall, fjöldi Brottfall %
Bóknám 11.414 1.331 11,7
Starfsnám 6.836 1.426 20,9
Alls 18.250 2.757 15,1
Brottfallnir eftir skólum.
Skóli Nem. 2002 Brottfall, fjöldi Brottfall %
Borgarholtsskóli 952 231 24,3
Fjölbrautaskóli Norðurlands vestra 400 91 22,8
Fjölbrautaskóli Suðurlands 789 124 15,7
Fjölbrautaskóli Suðurnesja 714 124 17,4
Fjölbrautaskóli Vesturlands 593 106 17,9
Fjölbrautaskóli Vesturlands, útibú Stykkishólmi 13 2 15,4
Fjölbrautaskólinn í Breiðholti 1.196 166 13,9
Fjölbrautaskólinn í Garðabæ 575 55 9,6
Fjölbrautaskólinn við Ármúla 831 173 20,8
Flensborgarskóli 550 47 8,5
Framhaldsskólinn á Húsavík 129 25 19,4
Framhaldsskólinn á Laugum 118 25 21,2
Framhaldsskólinn í A-Skaftafellssýslu 115 37 32,2
Framhaldsskólinn í Vestmannaeyjum 250 51 20,4
Garðyrkjuskólinn á Reykjum 36 1 2,8
Hólaskóli á Hólum í Hjaltadal 57 4 7,0
Hússtjórnarskólinn á Hallormsstað 24 0 0,0
Hússtjórnarskólinn í Reykjavík 23 0 0,0
Iðnnemar á samningi utan skóla 759 197 26,0
Iðnskólinn í Hafnarfirði 519 147 28,3
Iðnskólinn í Reykjavík 1.546 416 26,9
Kvennaskólinn í Reykjavík 511 27 5,3
Landbúnaðarháskólinn á Hvanneyri 43 4 9,3
Listdansskóli Íslands 6 0 0,0
Menntaskólinn að Laugarvatni 168 22 13,1
Menntaskólinn á Akureyri 632 17 2,7
Menntaskólinn á Egilsstöðum 298 33 11,1
Menntaskólinn á Ísafirði 303 45 14,9
Menntaskólinn í Kópavogi 935 97 10,4
Menntaskólinn í Reykjavík 765 20 2,6
Menntaskólinn við Hamrahlíð 977 58 5,9
Menntaskólinn við Sund 731 36 4,9
Myndlistarskólinn á Akureyri 17 1 5,9
Myndlistarskólinn í Reykjavík 19 0 0,0
Snyrtiskóli Reykjavíkur 25 2 8,0
Stýrimannaskólinn í Reykjavík 66 13 19,7
Tannsmiðaskóli Íslands 8 3 37,5
Tækniháskóli Íslands 126 19 15,1
Verkmenntaskóli Austurlands 165 45 27,3
Verkmenntaskólinn á Akureyri 1.042 248 23,8
Verslunarskóli Íslands 1.045 23 2,2
Vélskóli Íslands 140 16 11,4
Viðskiptaháskólinn á Bifröst 39 6 15,4
Alls 18.250 2.757 15,1
Athugasemdir: Nemendur á almennri braut eru taldir með nemendum í bóknámi og nemendur í listnámi með nemendum í starfsnámi. Nemendur eru stundum skráðir í fleiri en einn skóla. Þá eru þeir settir í þann skóla sem þeir stunda aðallega nám í í nemendaskrá Hagstofu Íslands. Þó eru nemendur í listaskólum, sem líka stunda nám í öðrum skólum, settir í aðra skóla en listaskóla.