Aðrar útgáfur af skjalinu: PDF - Word Perfect. Ferill 246. máls.
140. löggjafarþing 2011–2012.
Þingskjal 379  —  246. mál.



Svar



velferðarráðherra við fyrirspurn Sigmundar Ernis Rúnarssonar um fæðingardeildir.


     1.      Hversu mörgum fæðingardeildum hefur verið lokað á heilbrigðisstofnunum utan Reykjavíkur frá 2000?
    Fæðingarhjálp er veitt á heilbrigðisstofnunum á landinu í samræmi við lög um heilbrigðisþjónustu, nr. 40/2007, með síðari breytingum, og reglugerð um heilbrigðisumdæmi, nr. 785/ 2007. Í leiðbeiningum um val á fæðingarstað sem landlæknisembættið gaf út árið 2007 eru sett fram skilmerki fyrir flokkun fæðingardeilda eftir þjónustustigum og starfsaðstæðum. Engum fæðingardeildum hefur verið formlega lokað á heilbrigðisstofnunum utan Reykjavíkur á síðasta áratug. Hins vegar hefur fæðingum fækkað á ýmsum stöðum á þessu tímabili eins og sjá má í töflu. Þetta tengist meðal annars því að vaktir á skurðstofum hafa lagst af á stöðum eins og í Reykjanesbæ, Selfossi og Sauðárkróki. Örðugt hefur reynst og jafnvel ógerlegt að fá almenna skurðlækna til starfa á landsbyggðinni til að halda uppi slíkri þjónustu.

Tafla. Fæðingar á heilbrigðisstofnunum og í heimahúsum 2001–2010.


2001 2002 2003 2004 2005 2006 2007 2008 2009 2010 Samt.
LSH 2.819 2.791 2.865 2.973 3.026 3.074 3.129 3.373 3.500 3.420 30.970
FSA 443 418 430 410 424 435 450 434 446 515 4.405
Reykjanesbær 213 232 223 209 177 204 247 251 273 172 2.201
Akranes 196 158 204 224 227 238 270 262 273 358 2.410
Selfoss 144 147 149 147 153 152 177 184 162 95 1.510
Ísafjörður 62 62 49 61 53 52 47 73 54 55 568
Vestmannaeyjar 41 44 33 43 34 36 42 38 40 37 388
Húsavík 14 5 10 6 1 0 1 0 0 0 37
Sauðárkrókur 16 22 16 17 29 19 14 29 15 4 181
Neskaupstaður 35 34 50 59 62 70 61 70 82 87 610
Egilsstaðir 19 11 0 0 0 1 0 0 0 0 31
Blönduós 12 3 7 5 0 0 0 0 0 0 27
Siglufjörður 4 2 6 2 2 0 0 0 0 0 16
Stykkishólmur 0 0 0 0 0 0 0 0 0 0 0
Patreksfjörður 4 6 2 2 0 0 0 0 0 0 14
Höfn í Hornafirði 2 17 8 4 9 16 5 6 4 4 75
Heilsugæslur 0 2 1 1 4 2 1 11
Heimafæðingar 19 25 26 25 43 46 51 61 89 86 471
Samtals 4.043 3.977 4.080 4.187 4.241 4.344 4.498 4.783 4.939 4.833 43.925


     2.      Hvar á landinu þurfa konar að fara lengstan veg til fæðinga á sjúkrahúsi?
    Konur á Þórshöfn á Langanesi eiga um lengstan veg að fara til að fæða börn á sjúkrahúsi. Heiman frá þeim eru 250 km til Akureyrar eða Neskaupstaðar.

     3.      Hversu víða á landinu er engin fæðingardeild í klukkustundarakstursfjarlægð frá byggð?
    Ef gert er ráð fyrir að klukkustundarakstursfjarlægð sé 75 km eru eftirtalin byggðasvæði á landinu lengra frá fæðingardeild en sem því nemur: Snæfellsnes, Dalasýsla, Barðastrandarsýslur, Strandasýsla, Norðurþing, Vopnafjörður og Vestur-Skaftafellssýsla.

     4.      Hversu víða á landinu eru fleiri en ein fæðingardeild í minna en klukkustundarfjarlægð frá byggð?
    Miðað við sömu forsendur er suðvesturhorn landsins frá Borgarnesi og sunnanverðum Borgarfirði að sunnanverðri Árnessýslu í minna en klukkustundarakstursfjarlægð frá fleiri en einni fæðingardeild.