Ferill 525. máls. Aðrar útgáfur af skjalinu: PDF - Word Perfect.
144. löggjafarþing 2014–2015.
Þingskjal 1003 — 525. mál.
Svar
innanríkisráðherra við fyrirspurn frá Haraldi Einarssyni um einbreiðar brýr.
1. Hvað eru margar einbreiðar brýr á vegum landsins þar sem hámarkshraði er 90 km/klst. og hvar eru þær, skipt eftir kjördæmum annars vegar og hins vegar sveitarfélögum?
Fjöldi brúa í umsjón Vegagerðarinnar er um 1190. Á þjóðvegakerfinu eru 694 einbreiðar brýr, en af þeim eru 197 einbreiðar brýr þar sem hámarkshraði er 90 km/klst. Meðalaldur einbreiðra brúa eru 50 ár.
Fjölda einbreiðra brúa, þar sem hámarkshraði er 90 km/klst, skipt eftir kjördæmum annars vegar og eftir sveitarfélögum hins vegar, má sjá í eftirfarandi töflum:
| Kjördæmi | Fjöldi |
| Norðausturkjördæmi | 57 |
| Norðvesturkjördæmi | 61 |
| Suðurkjördæmi | 73 |
| Suðvesturkjördæmi | 6 |
| 197 | |
| Sveitarfélag | Fjöldi |
| Akrahreppur | 1 |
| Ásahreppur | 2 |
| Bláskógabyggð | 7 |
| Blönduósbær | 1 |
| Borgarbyggð | 6 |
| Borgarfjarðarhreppur | 3 |
| Breiðdalshreppur | 1 |
| Dalabyggð | 8 |
| Djúpavogshreppur | 7 |
| Eyjafjarðarsveit | 5 |
| Fjarðabyggð | 7 |
| Fljótsdalshérað | 5 |
| Fljótsdalshreppur | 6 |
| Flóahreppur | 1 |
| Grímsnes- og Grafningshreppur | 5 |
| Hrunamannahreppur | 1 |
| Húnaþing vestra | 5 |
| Hvalfjarðarsveit | 4 |
| Hörgársveit | 1 |
| Ísafjarðarbær | 6 |
| Kjósarhreppur | 6 |
| Langanesbyggð | 2 |
| Mýrdalshreppur | 1 |
| Norðurþing | 3 |
| Rangárþing eystra | 8 |
| Rangárþing ytra | 3 |
| Reykhólahreppur | 4 |
| Skaftárhreppur | 13 |
| Skeiða- og Gnúpverjahreppur | 6 |
| Skútustaðahreppur | 1 |
| Snæfellsbær | 1 |
| Strandabyggð | 8 |
| Súðavíkurhreppur | 4 |
| Svalbarðshreppur | 2 |
| Sveitarfélagið Hornafjörður | 22 |
| Sveitarfélagið Skagafjörður | 8 |
| Sveitarfélagið Ölfus | 4 |
| Tálknafjarðarhreppur | 1 |
| Tjörneshreppur | 1 |
| Vesturbyggð | 4 |
| Vopnafjarðarhreppur | 4 |
| Þingeyjarsveit | 9 |
| 197 |
2. Er til áætlun í ráðuneytinu um að ljúka tvöföldun þessara brúa?
Á undanförnum áratugum hefur náðst mikill árangur í fækkun einbreiðra brúa. Má segja að verstu staðirnir á umferðarmestu vegunum hafi verið lagfærðir að mestu. Eins og fram kemur hér að framan er þó enn mikið verk óunnið. Í mörgum nýbyggingum og endurbyggingum vega eru gerðar nýjar brýr sem koma í stað annarra gamalla og oftast einbreiðra brúa. Í vegáætlunarhluta samgönguáætlunar 2011–2022 er gert sérstaklaga ráð fyrir fjárveitingu til breikkunar einbreiðra brúa að upphæð 1.500 millj. kr. á tímabilinu.
Þær 197 brýr sem greint er frá hér að framan eru samtals 9.436 m að lengd. Stærðargráða kostnaðar við að endurgera brýr af slíkri lengd og tvöfaldar að breidd gæti verið 30 milljarðar. Til viðbótar kæmi síðan kostnaður við vegagerð sem er mismikill eftir aðstæðum á hverjum stað. Verkefnið er því gríðarlega stórt.
Ekki er lengur eins mikið um áberandi slysastaði við einbreiðar brýr í vegakerfinu enda hefur verið gert átak í að merkja einbreiðu brýrnar sérstaklega og á áberandi hátt.
3. Hyggst ráðherra beita sér fyrir því að fækka einbreiðum brúm og ef svo er, munu merki þess sjást í næstu samgönguáætlun?
Eins og áður segir er gert ráð fyrir sérstakri fjárveitingu til breikkunar brúa í samgönguáætlun. Eins mun einbreiðum brúm væntanlega fækka jafnt og þétt eftir því sem nýbyggingu og endurbyggingu vega miðar fram. Væntanlega mun þannig takast að ná umtalsverðum árangri í fækkun brúa með samþykkt nýrrar samgönguáætlunar 2015–2026. Í stefnumótun þeirrar áætlunar er umferðaröryggi fremst á blaði og áhersla lögð á úrbætur við slysastaði, þar á meðal einbreiðar brýr.
