Ferill 236. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 252 — 236. mál.
Fyrirspurn
til heilbrigðisráðherra um starfsemi umdæmissjúkrahúss Austurlands.
Frá Ingibjörgu Þórðardóttur.
1. Er stefna stjórnvalda að draga stórlega úr þjónustu umdæmissjúkrahúss Austurlands í Neskaupstað með því að fjársvelta stofnunina ár eftir ár og taka ekki þátt í kostnaði við þjónustu farandsérfræðinga?
2. Er áformað að lækka starfshlutfall rekstrarstjóra umdæmissjúkrahúss Austurlands og þá hversu mikið?
3. Hefur farið fram athugun á hagkvæmni þess að starfrækja fæðingar-, bráða- og skurðstofuþjónustu fyrir einfaldari aðgerðir á Austurlandi í stað þess að senda fólk sem þarf á þessari þjónustu að halda í aðra landsfjórðunga og á hvaða forsendum er núverandi tilhögun reist?
4. Á fulltrúi umdæmissjúkrahúss Austurlands sæti í stjórn Heilbrigðisstofnunar Austurlands? Ef svo er ekki, hvaða skýringar eru á því og hvað ræður skipan stjórnar?
5. Er að því stefnt að endurhæfingarstarf það sem fram fer við umdæmissjúkrahús Austurlands verði starfrækt áfram og mun sjúkrahúsið hljóta stuðning til þess frá ráðherra og ráðuneyti?
6. Hversu mikilvægur er flugvöllurinn í Neskaupstað fyrir heilbrigðisþjónustu á staðnum og hyggst ráðherra stuðla að því að flugvöllurinn gegni hlutverki sem sjúkraflugvöllur?
Skriflegt svar óskast.
