Ferill 262. máls. Aðrar útgáfur af skjalinu: PDF - Word Perfect.

---

145. löggjafarþing 2015–2016.
Þingskjal 289  —  262. mál.

Frumvarp til laga

um breytingu á lögum um þingsköp Alþingis, nr. 55/1991, með síðari breytingum.

Flm.: Björn Leví Gunnarsson, Ásta Guðrún Helgadóttir, Helgi Hrafn Gunnarsson.

1. gr.

    Eftirfarandi breytingar verða á 45. gr. laganna:
     a.      Við 1. mgr. bætist nýr málsliður, svohljóðandi: Tillögu um vantraust á ríkisstjórn eða ráðherra skal þó setja á dagskrá þingfundar svo fljótt sem auðið er og eigi síðar en tveimur nóttum eftir útbýtingu hennar nema samkomulag um annað sé á milli þingflokka.
     b.      Við 2. mgr. bætist nýr málsliður, svohljóðandi: Fjórðungur þingmanna getur farið fram á að atkvæðagreiðsla um tillögu um vantraust á ríkisstjórn eða ráðherra verði leynileg. Við atkvæðagreiðsluna merkir hver þingmaður við „já“ eða „nei“ á atkvæðaseðli eða skilar auðu.

2. gr.

    Lög þessi öðlast þegar gildi.

Greinargerð.

    Með frumvarpinu eru lagðar til fyllri reglur um framlagningu vantrauststillagna og meðferð þeirra í þinginu en kveðið er á um í lögum um þingsköp Alþingis. Með frumvarpinu er lagt til að kveðið verði skýrt á um að komi fram tillaga um vantraust á ríkisstjórn eða ráðherra skuli setja hana á dagskrá þingfundar svo fljótt sem auðið er og eigi síðar en tveimur nóttum eftir útbýtingu hennar nema samkomulag sé um annað milli þingflokka. Verður að telja að vegna eðli slíkrar tillögu sé rétt að taka hana fyrir sem fyrst nema samkomulag sé um annað.
    Meginbreytingin sem frumvarpið felur í sér er að fjórðungur þingmanna geti farið fram á að atkvæðagreiðslan um vantrauststillögu verði leynileg. Markmiðið með þeirri tilhögun er að gera þingmönnum kleift að greiða atkvæði eftir sannfæringu sinni án utanaðkomandi þrýstings hvort sem hann er frá samþingsmönnum, kjósendum, fjölmiðlum eða öðrum.
    Lagt er til að miðað verði við að fjórðungur þingmanna geti farið fram á að atkvæðagreiðslan verði leynileg og skrifleg þannig að þingmenn fái tilbúinn atkvæðaseðil og geti merkt við fyrir fram gerða reiti, „já“ eða „nei“, eða skilað auðu. Tillagan um að miðað verði við að fjórðungur þingmanna geti farið fram á þetta er í samræmi við ráðgefandi tilmæli þings Evrópuráðsins um réttindi og ábyrgð stjórnarandstöðunnar í störfum þinga í lýðræðisríkjum nr. 1601 (2008) og er sú regla sem birtist jafnframt í þingsköpum Alþingis.