Ferill 391. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 537 — 391. mál.
Fyrirspurn
til innanríkisráðherra um skotvopnavæðingu almennra lögreglumanna.
Frá Bjarkeyju Olsen Gunnarsdóttur.
1. Á hvaða rannsóknum eða þarfagreiningum byggist ákvörðun um að koma vopnabúri fyrir í lögreglubifreiðum sem notaðar eru til almennrar löggæslu og hvar eru þær aðgengilegar?
2. Hverrar gerðar og stærðar eru þau skotvopn sem komið verður fyrir í vopnabúri lögreglubifreiða?
3. Hversu margar lögreglubifreiðar verða búnar skotvopnum, hvar verða þær á landinu og hver er kostnaðurinn við að útbúa lögreglubifreiðar með skotvopnum?
4. Hvaða ástæður eru fyrir því að verja fé til að búa almenna lögreglumenn skotvopnum frekar en að fjölga lögreglumönnum eða efla og treysta starfsmenntun þeirra, t.d. til að fást við rannsókn kynferðisbrota?
5. Er það raunin að vopnabúri verði komið fyrir í lögreglubifreiðum á höfuðborgarsvæðinu áður en lögreglumenn á landsbyggðinni verða vopnaðir? Ef svo er, hvað réttlætir þá ráðstöfun með tilliti til staðsetningar og viðbragðstíma sérsveitar lögreglunnar?
6. Hefur farið fram áhættumat vegna ákvörðunar um að koma vopnabúri fyrir í lögreglubifreiðum sem notaðar eru til almennrar löggæslu, t.d. með tilliti til þess hvort ráðstöfunin auki líkur á því að afbrotamenn vopnist? Ef svo er, hver var niðurstaða þess og hver vann það?
7. Hvaða þjálfun hafa þeir lögreglumenn fengið sem munu bera vopnin sem geymd verða í vopnabúrum í almennum lögreglubifreiðum, hversu margir lögreglumenn hafa hlotið slíka þjálfun og hvernig skiptist fjöldi þeirra milli kynja?
Skriflegt svar óskast.
