Ferill 402. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 883 — 402. mál.
2. umræða.
Nefndarálit
um frumvarp til laga um neytendasamninga.
Frá allsherjar- og menntamálanefnd.
Nefndin hefur fjallað um málið og fengið á sinn fund Björn Frey Björnsson og Guðrúnu Rósu Ísberg frá innanríkisráðuneyti og Daða Ólafsson og Matthildi Sveinsdóttur frá Neytendastofu.
Með frumvarpinu er lagt til að tilskipun Evrópuþingsins og ráðsins 2011/83/ESB um réttindi neytenda verði innleidd í íslenskan rétt. Tilskipunin var tekin upp í EES-samninginn með ákvörðun sameiginlegu EES-nefndarinnar nr. 181/2012 frá 28. september 2012. Markmið tilskipunarinnar er að samræma reglur aðildarríkja EES-svæðisins um samninga utan fastrar starfsstöðvar seljanda og fjarsölusamninga, auk sölu- og þjónustusamninga, og um hvaða atriði seljanda er skylt að upplýsa neytanda áður en slíkir samningar verða skuldbindandi af hálfu neytanda. Verði frumvarpið að lögum munu lög nr. 46/2000, um húsgöngu- og fjarsölusamninga, falla brott en með þeim voru eldri tilskipanir innleiddar í íslenskan rétt, þ.e. tilskipun ráðsins 85/577/EBE frá 20. desember 1985 um að vernda neytendur þegar samningar eru gerðir utan fastra starfsstöðva og tilskipun Evrópuþingsins og ráðsins 97/7/EB frá 20. maí 1997 um neytendavernd að því er varðar fjarsölusamninga.
Helstu breytingar sem verða við innleiðingu tilskipunar Evrópuþingsins og ráðsins 2011/83/ESB í íslensk lög eru annars vegar að strangari kröfur verða gerðar um form samninga utan fastrar starfsstöðvar og fjarsölusamninga og hins vegar verður skýrar kveðið á um rétt neytanda til að falla frá samningi og verður meginreglan þar að lútandi 14 dagar. Verði frumvarpið að lögum fá neytendur aukinn rétt til að falla frá samningi.
Nefndin bendir á að innanríkisráðherra hefur boðað að fram fari heildarendurskoðun á neytendalöggjöfinni í því skyni að einfalda reglur og gera þær gagnsærri.
Nefndin leggur til að frumvarpið verði samþykkt óbreytt.
Alþingi, 23. febrúar 2016.
Unnur Brá Konráðsdóttir, form. |
Vilhjálmur Árnason, frsm. |
Róbert Marshall. |
Líneik Anna Sævarsdóttir. | Karl Garðarsson. | Ólína Kjerúlf Þorvarðardóttir. |
Helgi Hrafn Gunnarsson. | Haraldur Einarsson. | Bjarkey Olsen Gunnarsdóttir. |