Ferill 530. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 1189 — 530. mál.
Svar
heilbrigðisráðherra við fyrirspurn frá Katrínu Jakobsdóttur um samninga um heilbrigðisþjónustu.
1. Hve margir samningar um heilbrigðisþjónustu skv. 28. gr. laga um heilbrigðisþjónustu hafa verið gerðir frá 2007? Óskað er eftir upplýsingum um umfang og inntak samninga, samningsaðila og gildistíma samninga.
Í meðfylgjandi töflu eru samningar sem í gildi eru við einkaaðila, sjálfseignarstofnanir og stofnanir sem falla undir undir önnur ráðuneyti en velferðarráðuneyti um heilbrigðisþjónustu og nú er unnið eftir. Á listanum eru bæði samningar við tilgreinda samningsaðila og rammasamningar sem fjöldi sjálfstætt starfandi heilbrigðsstarfsmanna eru aðilar að og má þar nefna sérgreinalækna og sjúkraþjálfara. Allir samningarnir hafa verið endurnýjaðir reglulega frá árinu 2007 og flestir verið í gildi allan þann tíma sem spurt er um. Listinn nær ekki til samninga við hjúkrunarheimili en nú er unnið að heildstæðri samningsgerð um þjónustu hjúkrunarheimila og er þess vænst að þeirri vinnu ljúki á þessu ári. Kostnaður í meðfylgjandi töflu miðast við fjárlög 2016 þegar einn samningur fellur undir fjárlaganúmer en miðað er við kostnað samkvæmt bókhaldi 2015 þegar fleiri samningar falla undir fjárlaganúmer þar sem sérgreind fjárhæð vegna 2016 liggur ekki fyrir í aðgengilegum gögnum.
| Kostnaður | Flokkun | Viðsemjendur | Tegund þjónustu |
| 106,1 | Áfengismeðferð | Meðferðarheimilið í Krýsuvík | Langtímaáfengis- og vímuefnameðferð |
| 854,7 | Áfengismeðferð | SÁÁ | Áfengis- og vímuefnameðferð á Vogi og dagdeildum |
| 41,6 | Endurhæfing | Þraut ehf. | Endurhæfing fyrir einstaklinga með vefjagigt |
| 8,2 | Endurhæfing | HL-stöðin á Akureyri | Samningur um endurhæfingu og þjálfun |
| 40,6 | Endurhæfing | HL-stöðin í Reykjavík | Samningur um endurhæfingu og þjálfun |
| 1729,3 | Endurhæfing | Reykjalundur/Hlein | Endurhæfing á Reykjalundi |
| 221,2 | Endurhæfing | Styrktarfélag lamaðra og fatlaðra | Sjúkra- og iðjuþjálfun barna og ungmenna |
| 656,6 | Endurhæfing | Náttúrulækningafélag Íslands | Þverfaglega endurhæfing |
| 53,3 | Heimahjúkrun | Heimahlynning | Líknandi hjúkrunarmeðferð í heimahúsum |
| 88,1 | Heimahjúkrun | Karitas | Sérhæfð líknandi hjúkrunarmeðferð í heimahúsum |
| 65,4 |
Heimahjúkrun |
Heilsueflingarmiðstöðin |
Sérhæfð hjúkrunarmeðferð fyrir alvarlega langveik börn |
| 1319,4 | Heimahjúkrun | Reykjavíkurborg | Þjónustusamningur um hjúkrun í heimahúsum |
| 17,0 |
Heimilislækningar |
Heimilislæknastöðin |
Heilbrigðisþjónusta í fangelsum á Reykjavíkursvæðinu |
| 376,4 | Heimilislækningar | Læknavaktin | Móttökuvakt og vitjanir heimilislækna |
| 225,0 | Heimilislækningar | Heimilislæknastöðin | Rekstur heilsugæslu í Lágmúla |
| 368,2 | Heimilislækningar | Salus | Rekstur Heilsugæslustöðvarinnar í Salahverfi |
| 280,0 | Heimilislækningar | Sjálfstætt starfandi heimilislæknar | Sjálfstætt starfandi heimilislæknar (HUH) |
| 25,0 | Húðmeðferð | Bláa Lónið | Samningur um húðmeðferð í Bláa Lóninu |
| 9 ,4 | Iðjuþjálfun | Sjálfsbjörg Akureyri | Iðjuþjálfun |
| 7,4 | Iðjuþjálfun | Gigtarfélag Íslands | Iðjuþjálfun vegna gigtarsjúkdóma o.fl. |
| 385,0 | Krabbameinsleit | Krabbameinsfélag Íslands | Leit að krabbameini í leghálsi og brjóstum |
| 199,7 | Ljósmæður | Ljósmæður | Rammasamningur um heimaþjónustu ljósmæðra |
| 4,8 | Læknishjálp | Útlitslækning ehf. | Lasermeðferð |
| 23,4 | Læknishjálp | Lasersjón | Augasteinsaðgerðir |
| 22,8 | Læknishjálp | Sjónlag | Augasteinsaðgerðir |
| 1,0 | Læknishjálp | Augljós | Laseraðgerðir á augum |
| 1,5 | Læknishjálp | Augnlæknar Reykjavíkur | Meðferð með laser við gláku |
| 28,2 | Læknishjálp | Húðlæknastöðin | Meðferð með lasertækjum |
| 5.364,1 | Læknishjálp | Sérgreinalæknar | Rammasamningur um þjónustu sérgreinalækna |
| 1,6 | Læknishjálp | Lasersjón | Aðgerðir með excimer lasertækni |
| 2,5 | Læknishjálp | Sjónlag | Aðgerðir með lasik leysitækni |
| 85,1 | Læknishjálp | Barnalæknaþjónustan | Samningur um barnalæknaþjónustu |
| 312,0 | Myndgreining | Íslensk myndgreining | Samningur um myndgreiningu |
| 683,1 | Myndgreining | Læknisfræðileg myndgreining | Samningur um myndgreiningu |
| 7,4 | Rannsóknir | Krabbameinsfélag Íslands | Rannsóknir í frumumeinafræði |
| 75,4 | Rannsóknir | Hjartavernd | Þjónustusamningur við Hjartavernd |
| 0,3 |
Rannsóknir |
Rannsóknast. í lyfja- og eiturefnafræðum | Rannsóknir í lyfja- og eiturefnafræðum |
| 218,3 | Rannsóknir | Vefjarannsóknastofan Álfheimum | Samningur um rannsóknir í líffærameinafræði |
| 328,6 | Rannsóknir | Rannsóknastofan í Glæsibæ | Blóðmeina- og efnameinafræðirannsóknir |
| 345,2 | Rannsóknir | Rannsóknasetrið í Mjódd | Blóðmeina- og efnameinafræðirannsóknir |
| 4,1 | Sálfræðiþjónusta | Sálfræðingar | Sálfræðiþjónusta fyrir börn |
| 45,0 | Sjúkraflutningar | Ernir ehf. | Sjúkraflug til útlanda |
| 9,8 | Sjúkraflutningar | Landhelgisgæsla Íslands | Sjúkraflug með þyrlu |
| 20,0 | Sjúkraflutningar | Akureyrarbær | Sjúkraflutningar á Akureyri |
| 12,7 | Sjúkraflutningar | Akureyrarbær | Þjónusta sjúkraflutningamanna við sjúkraflug |
| 18,0 | Sjúkraflutningar | Brunavarnir Suðurnesja | Samningur um sjúkraflutninga á Suðurnesjum |
| 702,0 |
Sjúkraflutningar |
Slökkvilið höfuðborgarsvæðisins |
Samningur um sjúkraflutninga á höfuðborgarsvæðinu |
| 252,4 | Sjúkraflutningar | Mýflug hf. | Samningur um sjúkraflug |
| 192,5 | Sjúkraflutningar | Rauði Kross Íslands | Útvegun og rekstur sjúkrabifreiða |
| 0,3 | Sjúkrahótel | Gististaðir á Akureyri | Gistiþjónusta fyrir sjúklinga á Akureyri |
| 171,0 | Sjúkrahótel | Heilsumiðstöðin/Sinnum | Rekstur sjúkrahótels |
| 75,4 | Sjúkraþjálfun | Endurhæfing ehf. | Þjálfun einstaklinga með fjölþættar skerðingar |
| 0,7 | Sjúkraþjálfun | Salus | Innleiðing hreyfiseðla í heilbrigðiskerfinu |
| 0,7 | Sjúkraþjálfun | Heimilislæknastöðin | Innleiðing hreyfiseðla í heilbrigðiskerfinu |
| 1,0 | Sjúkraþjálfun | Reykjalundur | Innleiðing hreyfiseðla í heilbrigðiskerfinu |
| 5,0 | Sjúkraþjálfun | Styrkur | Innleiðing á hreyfiseðlum í heilbrigðiskerfinu |
| 99,1 | Sjúkraþjálfun | Sjálfsbjörg Akureyri | Samningur um sjúkraþjálfun |
| 1.957,7 | Sjúkraþjálfun | Sjúkraþjálfarar | Rammasamningur við sjúkraþjálfara |
| 25,1 | Skráning | Krabbameinsfélag Íslands | Skrá um krabbameinsleit |
| 139,2 | Talþjálfun | Talmeinafræðingar | Rammasamningur um talmeinaþjónustu |
| 1.609,5 | Tannmál | Tannlæknar | Tannlækningar barna |
| 15,0 | Ungbarnavernd | Miðstöð foreldra og barna ehf. | Sérhæfð geðheilbrigðisþjónusta |
| 150,6 | Vistun | Reykjalundur/Hlein | Vistun á Hlein |
| 35,0 | Símaráðgjöf | Læknavaktin og HSN | Heilbrigðistengd símaráðgjöf |
2. Hefur farið fram rekstrarmat á gildandi samningum af hálfu Ríkisendurskoðunar eða ráðuneyta? Hverjar eru verklagsreglur varðandi samskipti ráðuneytis við aðila sem slíkir samningar hafa verið gerðir við?
Samkvæmt lögum nr. 112/2008, um sjúkratryggingar, annast sjúkratryggingastofnun samningsgerð um veitingu heilbrigðisþjónustu fyrir hönd ráðherra og hefur eftirlit með því að veitt þjónusta sé í samræmi við ákvæði samninga.
Í reglugerð nr. 510/2010 er nánar fjallað um samningsgerð sem Sjúkratryggingar Íslands annast í umboði ráðherra. Þar kemur fram að þegar dregur að lokum samningstíma skulu Sjúkratryggingar Íslands gera sérstaka úttekt á framkvæmd samnings og hversu vel þjónustuveitandi hefur uppfyllt samningskröfur. Úttektin skal gerð tímanlega svo að svigrúm gefist til að leita annarra leiða um rekstur verkefnisins reynist þess þörf. Sjúkratryggingar Íslands hafa gert slíkar úttektir vegna helstu samninga og hafa þær legið til grundvallar varðandi ákvarðanir um áframhaldandi samningsgerð. Þá staðfestir ráðherra alla samninga Sjúkratrygginga Íslands, sbr. 10. gr. reglugerðarinnar þar sem segir: „Heilbrigðisráðherra staðfestir samninga um heilbrigðisþjónustu eftir að þeir hafa verið undirritaðir af Sjúkratryggingum Íslands og þjónustuveitanda enda séu þeir gerðir á grundvelli stefnumörkunar ráðherra og þeirra skilyrða sem hann setti.“ Í aðdraganda staðfestingar er farið nánar ofan í ýmsa þætti samninga þegar ástæða er talin til. Ríkisendurskoðun fær sent afrit af öllum samningum sem falla undir reglugerðina og falla allir samningar undir eftirlit Ríkisendurskoðunar og er það ítrekað með ákvæði í samningum. Ekki eru til verklagsreglur um samskipti ráðuneytis við aðila sem samningar hafa verið gerðir við. Eins og fram kemur fyrr í svarinu hafa Sjúkratryggingar Íslands eftirlit með samningum um heilbrigðisþjónustu. Stofnunin skal skv. 45. gr. laga um sjúkratryggingar hafa samráð við landlækni um fyrirkomulag og framkvæmd eftirlits.
3. Hvernig er faglegu mati á samningum um heilbrigðisþjónustu háttað og hve oft fer slíkt mat fram? Hvernig er háttað skráningu heilbrigðisþjónustu sem veitt er samkvæmt samningum af þessu tagi?
Sjúkratryggingar Íslands skulu skv. 45. gr. laga um sjúkratryggingar hafa eftirlit með starfsemi samningsaðila sem miðar að því að tryggja að tegundir, magn, gæði, kostnaður og árangur þjónustu sé í samræmi við gerða samninga. Faglegt eftirlit með heilbrigðisþjónustu er í höndum embættis landlæknis og skulu Sjúkratryggingar Íslands og embætti landlæknis hafa samráð um fyrirkomulag og framkvæmd eftirlits með samningum á vegum Sjúkratrygginga Íslands. Veitendur heilbrigðisþjónustu skulu skrá öll samskipti við sjúklinga í sjúkraskrárkerfi í samræmi við lög um sjúkraskrá og eru ákvæði þess efnis í samningum.
4. Hverjar hafa arðgreiðslur verið til einkaaðila sem eru með samning við ríkið um veitingu heilbrigðisþjónustu frá árinu 2007?
Núgildandi samningar Sjúkratrygginga Íslands eru með þeim hætti að verksali fullgildir samningsskyldur sínar með því að veita umsamda þjónustu á umsömdu verði og hefur afkoma rekstrar, hagnaður eða tap og hugsanlegur arður af rekstri ekki áhrif á greiðslurnar. Eftirlit með samningum er ekki með þeim hætti að einstakar greiðslur þjónustuaðila séu skoðaðar.
