Ferill 594. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 1209 — 594. mál.
Svar
félags- og húsnæðismálaráðherra við fyrirspurn frá Helga Hrafni Gunnarssyni um kostnað við afnám skerðingar bóta.
Fyrirspurnin hljóðar svo:
Hver yrði árlegur aukakostnaður ríkissjóðs við almannatryggingakerfið ef hætt yrði að skerða bætur vegna greiðslna úr lífeyrissjóðum?
Samkvæmt upplýsingum frá Tryggingastofnun ríkisins yrði áætlaður aukakostnaður ríkissjóðs við almannatryggingakerfið ef hætt yrði að skerða bætur vegna greiðslna úr lífeyrissjóðum 24.714 millj. kr. á ári ef við það er miðað að lífeyrissjóðstekjur teldust áfram til heildartekna við mat á því hvort greiða skuli sérstaka uppbót á lífeyri vegna framfærslu, sbr. 2. mgr. 9. gr. laga um félagslega aðstoð, nr. 99/2007. Um er að ræða skerðingar á tekjutryggingu og heimilisuppbót elli- og örorkulífeyrisþega en elli- og örorkulífeyrir (grunnlífeyrir) og aldurstengd örorkuuppbót skerðast ekki vegna tekna úr lífeyrissjóðum. Þar af væri kostnaður vegna ellilífeyrisþega 20.243 millj. kr. og kostnaður vegna örorkulífeyrisþega 4.471 millj. kr.
Sé við það miðað að lífeyrissjóðstekjur teldust heldur ekki til tekna við mat á því hvort greiða skuli sérstaka uppbót á lífeyri vegna framfærslu er aukakostnaður ríkissjóðs áætlaður 36.820 millj. kr. á ári, þar af 29.885 millj. kr. vegna ellilífeyrisþega og 6.935 millj. kr. vegna örorkulífeyrisþega.
