Ferill 706. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 1259 — 706. mál.
Svar
mennta- og menningarmálaráðherra við fyrirspurn frá Bjarkeyju Olsen Gunnarsdóttur um flutning verkefna til sýslumannsembætta.
1. Hvernig miðar flutningi verkefna frá ráðuneytinu til sýslumannsembætta samkvæmt aðgerðaáætlun um flutning verkefna til embætta sýslumanna sem gerð var samkvæmt ákvæði til bráðabirgða I í lögum nr. 50/2014?
Ekkert verkefni hefur verið flutt úr ráðuneytinu til sýslumannsembætta.
2. Telur ráðherra unnt að flytja önnur verkefni úr ráðuneytinu til sýslumannsembætta en þau sem tiltekin eru í fyrrgreindri aðgerðaáætlun?
Ráðherra tók ekki afstöðu til tillagna í aðgerðaáætlun frá janúar 2015 um flutning verkefna úr ráðuneytinu til sýslumannsembætta. Sýslumenn gerðu þrjár tillögur um flutning tveggja verkefna sem þeir töldu að heyrðu undir mennta- og menningarmálaráðuneyti, annars vegar innheimtu gjaldfallinna en ógreiddra útlána Lánasjóðs íslenskra námsmanna en ákvörðun um tilhögun innheimtunnar er á forræði stjórnar sjóðsins samkvæmt lögum um sjóðinn, hins vegar útgáfu prófskírteina, löggildinga og sveins- og meistarabréfa í iðngreinum sem eru á ábyrgð atvinnuvega- og nýsköpunarráðuneytis auk leyfisveitinga til kennara en í ársbyrjun 2015 var háskólum sem brautskrá leikskóla- og grunnskólakennara falið að afhenda þeim leyfisbréf við brautskráningu. Ráðuneytið hefur á síðustu árum flutt verkefni á sviði sjóðaumsýslu, leyfisveitinga og eftirlits til undirstofnana og hyggst halda áfram á sömu braut en telur að þau henti ekki starfsemi sýslumannsembætta.
3. Hvaða aðferðum er beitt við ákvörðun um að flytja verkefni til sýslumannsembættis og hvað kemur einkum í veg fyrir flutning?
Við ákvörðun um flutning verkefna er metið hvort stofnun, t.d. sýslumannsembætti, hefur faglega kunnáttu á starfsemi í málaflokkum ráðuneytisins, hvort hún ræður yfir nauðsynlegum kerfum eða aðferðafræði og hversu vel verkefni, sem stendur til að flytja, fellur að verkefnum sem eru fyrir hjá viðkomandi aðila.