Ferill 680. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 1659 — 680. mál.
3. umræða.
Nefndarálit
um frumvarp til laga um breytingu á búvörulögum, búnaðarlögum og tollalögum (búvörusamningar, búnaðarlagasamningur).
Frá 1. minni hluta atvinnuveganefndar
Fyrsti minni hluti leggur til að farið verði að tillögum Samkeppniseftirlitsins um að fella úr gildi undanþágu mjólkuriðnaðarins frá samkeppnislögum og að gefinn verði rúmur frestur til þess eða til 1. janúar 2020. Með gildistöku fram í tímann vill 1. minni hluti koma til móts við sjónarmið um að langan aðdraganda þurfi að slíkri breytingu. Þetta sjónarmið hefur komið fram við meðferð málsins í nefndinni og í umræðum í þingsal.
Fyrsti minni hluti ítrekar að hann telur það afleita stöðu fyrir Alþingi að hafa svo takmarkaða möguleika til að gera breytingar á því frumvarpi sem hér liggur fyrir. 1. minni hluti leggur því til að ráðherra leggi fyrir Alþingi tillögu til þingsályktunar um samningsmarkmið ríkisins um endurskoðun búvörusamninga og búnaðarlagasamnings eigi síðar en í lok janúar 2019. Þau samningsmarkmið sæti þinglegri meðferð og við þau yrði stuðst í viðræðum við bændur og í fyrirhugaðri endurskoðun.
Í áliti 1. minni hluta við 2. umræðu málsins kom fram að ekki hefði tekist að fá upplýsingar um tolltekjur af innfluttum landbúnaðarvörum. Í umfjöllun í nefndinni eftir 2. umræðu bárust þær upplýsingar og má sjá þær í töflu í fylgiskjali með áliti þessu.
Alþingi, 12. september 2016.
Kristján L. Möller.
Fylgiskjal.
| Tolltekjur af innfluttum landbúnaðarvörum fyrir árin 2014 og 2015 | ||||
| Flokkur | Kafli | Heiti | Gjaldfærð upphæð 2014 |
Gjaldfærð upphæð 2015 |
| I | 1. kafli | Lifandi dýr | 0 | 0 |
| I | 2. kafli | Kjöt og ætir hlutar af dýrum | 744.322.928 | 840.753.698 |
| I | 4. kafli | Mjólkurafurðir; fuglaegg; náttúrlegt hunang; ætar vörur úr dýraríkinu, ót.a. | 87.787.441 | 92.614.612 |
| I | 5. kafli | Vörur úr dýraríkinu, ót.a. | 0 | 0 |
| II | 6. kafli | Lifandi tré og aðrar plöntur; blómlaukar, rætur og þess háttar; afskorin blóm og lauf til skrauts | 21.429.519 | 15.089.116 |
| II | 7. kafli | Matjurtir og tilteknar rætur og hnýði | 136.422.567 | 172.042.271 |
| II | 8. kafli | Ætir ávextir og hnetur; hýði af sítrusávöxtum eða melónum | 0 | 0 |
| II | 9. kafli | Kaffi, te, maté og krydd | 0 | 0 |
| II | 10. kafli | Korn | 36.931 | 25.467 |
| II | 11. kafli | Malaðar vörur; malt; sterkja; inúlín; hveitiglúten | 592.841 | 341.576 |
| II | 12. kafli | Olíufræ og olíurík aldin; ýmiss konar sáðkorn, fræ og aldin; plöntur til notkunar í iðnaði og til lyfja; hálmur og fóður | 0 | 3.178 |
| II | 13. kafli | Kvoðulakk, gúmkvoða og resín og aðrir jurtasafar og jurtakjarnar | 0 | 0 |
| II | 14. kafli | Fléttiefni úr jurtaríkinu; vörur úr jurtaríkinu, ót.a. | 0 | 0 |
| III | 15. kafli | Feiti og olíur úr dýra- og jurtaríkinu og klofningsefni þeirra; unnin matarfeiti; vax úr dýra- eða jurtaríkinu | 4.605.976 | 9.268.200 |
| IV | 16. kafli | Framleiðsla úr kjöti, fiski eða krabbadýrum, lindýrum eða öðrum vatnahryggleysingjum | 103.431.099 | 156.961.939 |
| IV | 17. kafli | Sykur og sætindi | 14.376.027 | 14.457.505 |
| IV | 18. kafli | Kakaó og framleiðsla úr kakaói | 93.350.011 | 101.331.187 |
| IV | 19. kafli | Framleiðsla úr korni, fínmöluðu mjöli, sterkju eða mjólk; sætabrauð | 189.697.197 | 210.743.827 |
| IV | 20. kafli | Framleiðsla úr matjurtum, ávöxtum, hnetum eða öðrum plöntuhlutum | 389.536.403 | 437.121.279 |
| IV | 21. kafli | Ýmis matvælaframleiðsla | 118.025.435 | 146.185.885 |
| IV | 22. kafli | Drykkjarvörur, áfengir vökvar og edik | 20.187.053 | 21.305.932 |
| IV | 23. kafli | Leifar og úrgangur frá matvælaframleiðslu; unnið skepnufóður | 918.347 | 5.170.437 |
| IV | 24. kafli | Tóbak og framleitt tóbakslíki | 0 | 0 |
| Samtals | 1.924.719.775 | 2.223.416.109 | ||
| Heimild: Tollstjóri (2014, 2015) | ||||
