Ferill 880. máls. Aðrar útgáfur af skjalinu: PDF - Word Perfect.
145. löggjafarþing 2015–2016.
Þingskjal 1829 — 880. mál.
Svar
fjármála- og efnahagsráðherra við fyrirspurn frá Birgi Ármannssyni um áhrif afnáms almenns vörugjalds og tolla á tekjur ríkisins.
Fyrirspurnin hljóðar svo:
1. Hver eru áætluð áhrif niðurfellingar almenns vörugjalds á vörur í 600 tollskrárnúmerum frá 1. janúar 2015 á tekjur ríkisins?
2. Hver eru áætluð áhrif niðurfellingar tolla á vörur í 320 tollskrárnúmerum frá 1. janúar 2016 á tekjur ríkisins?
3. Hver eru áætluð áhrif niðurfellingar tolla á vörur í 1.250 tollskrárnúmerum frá 1. janúar 2017 á tekjur ríkisins?
Svarið óskast sundurliðað eftir árum og auk beinnar tekjulækkunar verði hliðaráhrif á virðisaukaskatt metin.
1. Heildaráhrif niðurfellingar almenns vörugjalds í ársbyrjun 2015 voru talin vera um 7.700 millj. kr. til lækkunar á tekjum ríkissjóðs árið 2015. Upphæðin hefur ekki verið endurmetin en ekki verður annað séð en að hún hafi verið nokkuð raunhæf.
Áætluð áhrif almennra vörugjalda á tekjur ríkissjóðs (millj. kr.).
| Áætlað tekjutap á verðlagi 2015 | |
| Bein áhrif | -6.500 |
| Óbein áhrif (hliðaráhrif á virðisaukaskatt) | -1.200 |
| Samtals | -7.700 |
2. Heildaráhrif afnáms tolla af fatnaði og skóm í ársbyrjun 2016 eru talin vera um 2.000 millj. kr. til lækkunar á tekjum ríkissjóðs árið 2016. Um er að ræða endurmat á tekjuáhrifum frá því að frumvarp um afnám tolla var samþykkt á grundvelli endanlegra innflutningstalna fyrir árið 2015.
Áætluð áhrif niðurfellingar tolla á tekjur ríkissjóðs (millj. kr.).
| Áætlað tekjutap á verðlagi 2016 | |
| Bein áhrif | -1.600 |
| Óbein áhrif (hliðaráhrif á virðisaukaskatt) | -400 |
| Samtals | -2.000 |
3. Heildaráhrif afnáms tolla af annarri vöru en matvöru í ársbyrjun 2017, leiðrétt fyrir afnámi tolla af fatnaði og skóm, eru talin vera um 3.000 millj. kr. til lækkunar á tekjum ríkissjóðs árið 2017. Um er að ræða endurmat á tekjuáhrifum frá því að frumvarp um afnám tolla var samþykkt á grundvelli endanlegra innflutningstalna fyrir árið 2015.
Áætluð áhrif niðurfellingar tolla á tekjur ríkissjóðs (millj. kr.).
| Áætlað tekjutap á verðlagi 2017 | |
| Bein áhrif | -2.400 |
| Óbein áhrif (hliðaráhrif á virðisaukaskatt) | -600 |
| Samtals | -3.000 |
