Ferill 360. máls. Aðrar útgáfur af skjalinu: PDF - Word Perfect.

146. löggjafarþing 2016–2017.
Þingskjal 489  —  360. mál.



Frumvarp til laga


um breytingu á lögum um fjármálafyrirtæki, nr 161/2002, með síðari breytingum (virkur eignarhlutur, tilkynningarskylda).

Flm.: Smári McCarthy, Björn Leví Gunnarsson, Þórhildur Sunna Ævarsdóttir, Halldóra Mogensen, Gunnar I. Guðmundsson, Birgitta Jónsdóttir, Einar Brynjólfsson, Ásta Guðrún Helgadóttir, Gunnar Hrafn Jónsson, Jón Þór Ólafsson.


1. gr.

    21. tölul. 1. gr. a laganna orðast svo: Virkur eignarhlutur: Bein eða óbein hlutdeild í félagi.

2. gr.

    4. mgr. 19. gr. laganna orðast svo:
    Fjármálafyrirtæki skal tilgreina á vefsíðu nöfn og hlutfallslegt eignarhald allra þeirra sem eiga hlutafé eða stofnfé í fyrirtækinu á hverjum tíma. Fjármálafyrirtæki hefur fjóra daga til þess að uppfæra vefsíðuna frá því að eignarhald á hlut breytist. Sé lögaðili eigandi hlutafjár eða stofnfjár skal jafnframt koma fram hvaða einstaklingur eða einstaklingar séu raunverulegir eigendur viðkomandi lögaðila. Með raunverulegum eiganda samkvæmt ákvæði þessu er átt við einstakling eða einstaklinga sem eiga beina eða óbeina hlutdeild í félagi.

3. gr.

    Lög þessi öðlast þegar gildi.

Greinargerð.

    Komið hefur í ljós að auðvelt er að fara á svig við tilkynningarskyldu vegna virks eignarhlutar með því að ráðstafa eignarhlutum undir lágmarksviðmiðum. Sambærileg vandamál hafa komið upp víða erlendis og stundum hefur verið brugðið á það ráð að afnema viðmiðið og láta þannig alla hluthafa í bönkum undirgangast sömu gagnsæiskröfur. Með þessu frumvarpi er lagt til að lágmarksviðmiðin verði afnumin. Þetta hefði í för með sér aukið álag á fjármálafyrirtæki vegna skráningar eignarhluta, en það álag ætti ekki að vera gríðarlegt.