Ferill 441. máls. Aðrar útgáfur af skjalinu: PDF - Word Perfect.
146. löggjafarþing 2016–2017.
Þingskjal 875 — 441. mál.
Svar
samgöngu- og sveitarstjórnarráðherra við fyrirspurn frá Lilju Rafneyju Magnúsdóttur um sjóvarnir.
1. Hve oft á undanförnum fjórum árum hefur verið ráðist í gerð sjóvarna með það að markmiði að vernda menningarminjar, sbr. lög um sjóvarnir, og hvar hefur það verið gert?
Á síðustu fjórum árum hefur verið ráðist í fimm verkefni við sjóvarnir með það að markmiði að verja menningarminjar. Verkefnin eru eftirfarandi:
Knarrarnes – Vatnsleysuströnd 2014.
Hamarsrétt á Vatnsnesi – Húnaþing vestra 2014.
Mjóeyri við Eskifjörð – Fjarðabyggð 2016.
Norðan við Réttarholt, sjóvörn við Landsendarétt – Skagaströnd 2017 (ólokið).
Breiðagerðisvík – Vatnsleysuströnd 2017 (ólokið).
2. Liggja fyrir áform eða áætlanir um gerð sjóvarna til að vernda menningarminjar og þá hvar og hvaða minjar?
Samkvæmt lögum um sjóvarnir, nr. 28/1997, skal Vegagerðin sjá um að gera áætlun um sjóvarnir. Áætlunin skal koma fram í kafla um siglingamál í samgönguáætlun. Við gerð áætlunar skal hafa samstarf við sveitarstjórnir, landeigendur og aðra sem að málinu koma. Sveitarfélög skulu sækja um framlög úr ríkissjóði vegna sjóvarna til Vegagerðarinnar. Sveitarfélög eða landeigendur sem hafa hag af varnaraðgerðum á landi sínu greiða minnst 1/ 8 hluta kostnaðar en ríkissjóður allt að 7/ 8. Menningarminjar, sér í lagi fjarri byggð, sem eru í hættu vegna landbrots eru ekki alltaf á vitorði eða efst á forgangslista sveitarfélaga.
Á samgönguáætlun fyrir árin 2015–2018 var gert ráð fyrir að árið 2017 yrði farið í sjóvarnir á tveimur stöðum með það að markmiði að vernda menningarminjar, annars vegar við Skansinn á Álftanesi og hins vegar í Arfadalsvík vestan Grindavíkur. Við afgreiðslu fjárlaga 2017 voru ekki fjárveitingar til þessara verkefna.
3. Hvar á landinu er talið brýnast að gera sjóvarnir til að verjast sjávarflóðum og landbroti á næstu tveimur árum og hve mikið er áætlað að þær framkvæmdir kosti?
Hættumat á sjávarflóðum og sjávarrofi byggist á vinnu Vegagerðarinnar sem gerir sjóvarnaáætlun. Við forgangsröðun framkvæmda er lagt mat á hvaða framkvæmdir séu mest aðkallandi. Hætta af sjávarflóðum og sjávarrofi er síbreytileg. Hún getur breyst vegna breytinga á stöðu lands og sjávar, hækkandi sjávarstöðu vegna hnattrænnar hlýnunar, landriss, landsigs og landbrots. Sjóvarnir draga úr hættunni og færast strandsvæði niður í mati um leið og það er varið með sjóvarnargarði. Að sama skapi færist strandsvæði upp listann um forgangsröðun framkvæmda við rof.
Brýnustu verkefnin eru þau sem eru efst á listanum á hverjum tíma. Núna er það gerð sandfangara við Vík í Mýrdal. Verkið verður unnið á þessu ári. Áætlaður kostnaður er um 300 millj. kr. en það nemur ríflega tvöfaldri árlegri fjárveitingu til sjóvarna sl. sex ár. Einnig er unnið að sjóvörnum á Vatnsleysuströnd og Skagastönd en þau verk voru boðin út síðla árs 2016.
Nokkrum verkefnum, sem eru á samgönguáætlun 2015–2018, er ólokið vegna þess að ekki hafa fengist til þeirra fjárveitingar. Sjóvarnir sem átti að vera lokið á árinu 2017 eða fyrr eru í Dalvíkurbyggð, Árborg, Grindavík, Flatey á Breiðafirði, á Hliðsnesi í Garðabæ og á Seltjarnarnesi. Áætlaður heildarkostnaður við þessi verkefni er 88,6 millj. kr.
