Ferill 78. máls. Aðrar útgáfur af skjalinu: PDF - Word Perfect.

---

148. löggjafarþing 2017–2018.

Prentað upp.

Þingskjal 122  —  78. mál.

Beiðni um skýrslu

frá forsætisráðherra um ábendingar sem varða stjórnsýsluna í rannsóknarskýrslum Alþingis um orsakir falls íslensku bankanna 2008, orsakir erfiðleika og falls sparisjóðanna og Íbúðalánasjóð og viðbrögð við þeim.

Frá Birni Leví Gunnarssyni, Hönnu Katrínu Friðriksson, Halldóru Mogensen, Helga Hrafni Gunnarssyni, Ingu Sæland, Jóni Steindóri Valdimarssyni, Kolbeini Óttarssyni Proppé, Oddnýju G. Harðardóttur, Smára McCarthy og Þórhildi Sunnu Ævarsdóttur.

    Með vísan til 54. gr. stjórnarskrárinnar og 54. gr. laga um þingsköp Alþingis er þess óskað að forsætisráðherra flytji Alþingi skýrslu um ábendingar sem varða stjórnsýsluna og viðbrögð við þeim sem fram koma í rannsóknarskýrslu Alþingis um aðdraganda og orsakir falls íslensku bankanna 2008, í skýrslu rannsóknarnefndar um aðdraganda og orsakir erfiðleika og falls sparisjóðanna og í rannsóknarskýrslu um Íbúðalánasjóð.
    Í skýrslunni verði samantekt á ábendingum þeim til stjórnsýslunnar sem settar eru fram í skýrslunum og fjallað verði m.a. um:
     1.      hversu margar ábendingar koma fram sem beint er til stjórnsýslunnar,
     2.      hverjar þær ábendingar eru,
     3.      hvernig brugðist hefur verið við þeim og
     4.      hvaða ábendingum hefur ekki enn verið brugðist við.
    Í þeim tilvikum sem brugðist hefur verið við ábendingum er óskað eftir að upplýst verði:
     1.      hvernig tryggt hafi verið að þeim hafi verið og verði fylgt eftir,
     2.      hver hafi verið tilnefndur ábyrgðaraðili og
     3.      hvernig ráðherra hyggist fylgja eftir ábendingum þar sem ekki hefur verið tilnefndur ábyrgðaraðili.
    Óskað er eftir tæmandi lista yfir þær ábendingar sem ráðherra hyggst ekki bregðast við ásamt ástæðum þess og mati ráðherra á þeim árangri sem eftirfylgni hefur haft í för með sér og hvernig sá árangur er mældur.
    Óskað er eftir að forsætisráðherra safni saman upplýsingum frá öllum öðrum ráðherrum um ábendingar, sem falla inn á verksvið ráðuneyta þeirra, úr rannsóknarskýrslum sem hér er fjallað um. Forsætisráðherra skal samræma verklag við meðhöndlun og framsetningu upplýsinga.
    Að lokum er farið fram á að ráðherra geri grein fyrir þeim breytingum sem hafa orðið á starfsemi banka, sparisjóða og Íbúðalánasjóðs í kjölfar ábendinga úr rannsóknarskýrslum Alþingis.

Greinargerð.

    Rannsóknarnefndir Alþingis hafa skilað ítarlegu starfi og hafa þær þrjár rannsóknir sem farið hafa fram skilað rúmlega 5.000 blaðsíðum í 20 bindum. Á þessum síðum er að finna fjölmargar ábendingar um betri stjórnarhætti, öflugri stjórnsýslu og skýrari verkferla. Til þess að þessi mikilvæga greiningarvinna nýtist er nauðsynlegt að hafa yfirsýn yfir þessar ábendingar og tryggja að farið verði eftir þeim svo að sömu mistökin verði ekki gerð á ný.
    Vegna þess hversu yfirgripsmiklar skýrslurnar eru, er mjög erfitt að nálgast heildarsamantekt þeirra ábendinga sem þar eru settar fram og hvernig brugðist hefur verið við þeim. Mjög brýnt er því að þessi skýrsla verði lögð fram sem fyrst.
    Með þessari skýrslubeiðni er ætlast til þess að þing og þjóð fái yfirlit yfir stöðu mála hvað varðar þær ábendingar sem fram komu í þeim viðamiklu rannsóknarskýrslum sem hér um ræðir. Til að efla megi traust á störfum stjórnsýslunnar er nauðsynlegt að þessar skýrslur safni ekki ryki, heldur verði ábendingunum í þeim fylgt eftir.