Ferill 436. máls. Aðrar útgáfur af skjalinu: PDF - Word Perfect.
148. löggjafarþing 2017–2018.
Þingskjal 620 — 436. mál.
Fyrirspurn
til félags- og jafnréttismálaráðherra um framkvæmd laga
um almennar íbúðir og húsnæðissamvinnufélög.
Frá Birni Leví Gunnarssyni.
1. Hversu mörg félög hafa verið stofnuð frá setningu laga nr. 52/2016, um almennar íbúðir, og uppfylla skilyrði þeirra laga?
2. Hversu mörg slík félög, eða önnur félög, hafa sótt um og fengið stofnstyrki til byggingar eða kaupa á leiguíbúðum og hversu margar íbúðir hafa verið byggðar?
3. Hvað hefur ráðuneytið gert til að kynna, aðstoða og hvetja til stofnunar félaga um almennar íbúðir?
4. Hversu margar íbúðir telur ráðuneytið að þurfi að byggja til að mæta þeirri þörf sem talað er um í 1. gr. laga nr. 52/2016?
5. Hversu mörg húsnæðissamvinnufélög hafa verið stofnuð frá setningu laga nr. 29/2016, um breytingu á lögum nr. 66/2003, um húsnæðissamvinnufélög, sem uppfylla skilyrði laganna?
6. Hversu mörg eldri húsnæðissamvinnufélög eru starfandi og hversu mörg þeirra hafa sótt um stofnstyrki til ráðherra á grundvelli 2. mgr. 10. gr. laga nr. 52/2016?
7. Hver er rökstudd afstaða ráðherra til þess að lög um húsnæðissamvinnufélög einskorðist við samvinnufélög um búseturétt og að engin önnur form húsnæðissamvinnufélaga séu möguleg?
8. Hvað hefur ráðuneytið gert til þess að aðstoða og hvetja almenning til stofnunar húsnæðissamvinnufélaga og til að kynna þau fyrir honum?
9. Hefur ráðuneytið sett fram aðgengileg snið að samþykktum húsnæðissamvinnufélaga sem geta gagnast mismunandi formum húsnæðissamvinnufélaga?
10. Hvaða reglugerðir snerta starfsemi félaga sem falla undir fyrrnefnd lög?
11. Telur ráðherra eðlilegt að skráningarferli húsnæðissamvinnufélags taki meira en sex mánuði frá stofndegi og að velferðarráðuneytið svari ekki erindi vegna máls né geri grein fyrir í hvaða farveg mál er lagt?
Skriflegt svar óskast.
