Ferill 487. máls. Aðrar útgáfur af skjalinu: PDF - Word Perfect.


148. löggjafarþing 2017–2018.
Þingskjal 697  —  487. mál.




Tillaga til þingsályktunar


um uppsögn tollasamnings um landbúnaðarvörur við Evrópusambandið.


Flm.: Birgir Þórarinsson, Anna Kolbrún Árnadóttir, Bergþór Ólason, Gunnar Bragi Sveinsson, Sigmundur Davíð Gunnlaugsson, Sigurður Páll Jónsson, Þorsteinn Sæmundsson.


    Alþingi ályktar að fela utanríkisráðherra að segja upp tollasamningi við Evrópusambandið um landbúnaðarafurðir frá 2015 vegna brostinna forsendna og skorts á úttekt á áhrifum samningsins á innlenda búvöruframleiðslu. Uppsögnin taki gildi 1. maí 2018.

Greinargerð.

    Íslensk stjórnvöld undirrituðu tollasamning við Evrópusambandið (ESB) um landbúnaðarafurðir 17. september 2015. Samningurinn tekur gildi 1. maí 2018 og tekur við af tollasamningi sem gerður var við ESB árið 2007. Ef litið er á samninginn sést hversu óhagstæður hann er Íslandi. Samningurinn endurspeglar ekki stærðarmun markaðanna. Í ríkjum Evrópusambandsins er 500 milljóna manna markaður en Íslendingar eru 340 þúsund. Ekki er tekið tillit til gengisbreytinga og samkeppnisfærni íslensks landbúnaðar í ESB í viðskiptum með kjötvörur. Verulega hallar á Ísland í viðskiptum með ost en ESB fær að flytja til Íslands tollfrjálst 610 tonn af osti en Ísland til ESB aðeins 50 tonn. Engin úttekt fór fram á því hvaða áhrif samningurinn frá 2015 mundi hafa á innlenda búvöruframleiðslu. Tollasamningurinn á að færa íslenskum bændum sömu möguleika í Evrópu og ESB fær hér á landi. Það gerir samningurinn ekki. Síðast en ekki síst er nauðsynlegt að segja samningnum upp vegna brostinna forsendna, úrsögn Bretlands úr ESB gerir það að verkum að stærsta og besta markaðssvæði okkar kemur til með að hverfa úr samningnum á samningstímanum. Tollkvóti fyrir skyr var t.d. hugsaður fyrir Bretlandsmarkað.
    Nauðsynlegt er að samið verði upp á nýtt við ESB um tollkvóta á landbúnaðarafurðum í ljósi framangreinds.