Ferill 128. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 221 — 128. mál.
Svar
samgöngu- og sveitarstjórnarráðherra við fyrirspurn frá Heiðu Guðnýju Ásgeirsdóttur um einbreiðar brýr á Suðurlandsvegi.
Fyrirspurnin hljóðar svo:
Hyggst ráðherra bregðast við auknum umferðarþunga á Suðurlandsvegi, allt austur fyrir Jökulsárlón, vegna stóraukins fjölda ferðamanna síðustu ár á vegarkaflanum frá Reykjavík til Hafnar á þjóðvegi 1? Ef svo er, hversu mörgum einbreiðum brúm verður skipt út á þjóðvegi 1, á fyrrgreindum vegarkafla, á tímabili fjármálaáætlunar og hversu margar einbreiðar brýr verða eftir á sama vegarkafla við lok tímabils núgildandi fjármálaáætlunar?
Á Hringveginum frá Reykjavík og austur fyrir Jökulsárlón eru nú 14 einbreiðar brýr.
Samkvæmt tillögu að samgönguáætlun 2019–2023 og áætlunum Vegagerðarinnar um endurnýjun brúa verður sex af einbreiðum brúm skipt út á árunum 2018–2023. Átta einbreiðar brýr verða því eftir á þessum vegarkafla í lok árs 2023. Samkvæmt tillögu að samgönguáætlun fyrir árin 2019–2033 er síðan áætlað að skipta út sex brúm til viðbótar. Í lok árs 2033 má því gera ráð fyrir að eingöngu verði tvær einbreiðar brýr eftir á þessum vegarkafla, þ.e. brúin á Súlu á Skeiðarársandi (440 m ) og brúin á Jökulsá á Breiðamerkursandi (108 m).
Eftirfarandi tafla sýnir einbreiðar brýr á Hringveginum frá Reykjavík að Jökulsárlóni og áætlaðan tíma endurnýjunar eða endurbyggingar.
Númer vegar | Brú | Áætlaður tími endurbyggingar |
1-b5 | Jökulsá á Sólheimasandi | 2020–2021 |
1-a4 | Breiðbalakvísl | 2024–2028 |
1-a3 | Þverárvötn | 2024–2028 |
1-a3 | Hverfisfljót | 2019–2020 |
1-a2 | Brunná | 2019–2020 |
1-a1 | Súla | Ekki inni í áætlunum |
1-y9 | Skaftafellsá | 2029–2033 |
1-y8 | Svínafellsá | 2029–2033 |
1-y8 | Virkisá | 2029–2033 |
1-y7 | Kotá | 2029–2033 |
1-y6 | Stigá | 2018 |
1-y6 | Hólá | 2018 |
1-y5 | Kvíá í Öræfum | 2018–2019 |
1-y3 | Jökulsá á Breiðamerkursandi | Ekki inni í áætlunum |
Gert er ráð fyrir að halda áfram með 2+1 veg með aðskildum akbrautum með vegriði og planvegamótum ásamt hliðarvegum á kafla milli Selfoss og Hveragerðis. Í samgönguáætlun er einnig gert ráð fyrir að mæta auknu umferðarálagi á Suðurlandsvegi í vegakerfinu með því að breikka veginn frá Selfossi að Hellu, aðskilja akstursstefnur með 2+1 vegi og gera hliðarvegi til að fækka tengingum í plani. Einnig er gert ráð fyrir nýjum vegi norðaustan Selfoss með nýrri brú yfir Ölfusá. Þá er í samgönguáætlun gert ráð fyrir að fjármagna láglendisveg á Hringvegi um Mýrdal og jarðgöng í Reynisfjalli. Hringvegurinn um Gatnabrún í Mýrdal, sem nú er bæði brattur og með kröppum beygjum, verður einnig lagfærður en þessi staður er ein helsta hindrunin á þessum kafla Hringvegarins.