Ferill 205. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 283 — 205. mál.
Svar
sjávarútvegs- og landbúnaðarráðherra við fyrirspurn frá Önnu Kolbrúnu Árnadóttur um fulltrúa af landsbyggðinni í stjórnum, nefndum og ráðum.
Fyrirspurnin hljóðar svo:
Hvernig er skipulagi og stuðningi háttað við einstaklinga sem hafa verið tilnefndir af þingmönnum og skipaðir í stjórnir, nefndir og ráð á vegum atvinnuvega- og nýsköpunarráðuneytisins og búsettir eru utan höfuðborgarsvæðisins? Hvernig er farið með kostnað við flug, akstur, gistingu og mat og annan kostnað sem hlýst af fundafyrirkomulaginu? Væri mögulegt að viðhafa þá reglu að tímasetja fundi þannig að fulltrúar af landsbyggðinni gætu nýtt sér innanlandsflug samdægurs?
Hjá atvinnuvega- og nýsköpunarráðuneyti er almennt greiddur ferðakostnaður og annar sá kostnaður þeirra fulltrúa sem hafa verið skipaðir í nefndir eða starfshópa á þess vegum. Greitt er fyrir flug, bílaleigubíl eða aksturskostnað þeirra sem búa utan höfuðborgarsvæðisins. Ráðuneytið bókar flug og bílaleigubíla. Annar kostnaður svo sem gisting, matur og leigubílar er greiddur samkvæmt reikningum og akstur samkvæmt akstursdagbók.
Hvað varðar stjórnir þá er það yfirleitt í höndum viðkomandi stofnana eða sjóða að annast umsýslu og greiðslu kostnaðar vegna funda.
Formenn stjórna, nefnda og ráða ákveða fundartíma í samráði við aðra meðlimi og ber að gæta að hagkvæmni við þá ákvörðun.
