Ferill 190. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 371 — 190. mál.
Svar
umhverfis- og auðlindaráðherra við fyrirspurn frá Haraldi Benediktssyni um tíma fyrir athugasemdir við frummatsskýrslu hjá Skipulagsstofnun.
Fyrirspurnin hljóðar svo:
Hversu langur tími líður að meðaltali þar til athugasemdir berast Skipulagsstofnun við frummatsskýrslu, sbr. 4. mgr. 10. gr. laga um mat á umhverfisáhrifum, nr. 106/2000? Hver er lengsti og hver er stysti tími sem hefur liðið eftir að frummatsskýrsla hefur verið lögð fram til kynningar?
Samkvæmt lögum nr. 106/2000 stendur kynning frummatsskýrslu yfir í sex vikur sem jafnframt er sá frestur sem gefst til að koma skriflegum athugasemdum á framfæri við Skipulagsstofnun, sbr. 4. mgr. 10. gr. laga um mat á umhverfisáhrifum, nr. 106/2000. Almennt má segja að flestar athugasemdir berist á síðustu dögum kynningartíma. Í undantekningartilvikum berast athugasemdir að kynningartíma loknum. Berist athugasemdir skömmu eftir að kynningartíma lýkur hefur Skipulagsstofnun almennt samþykkt að taka á móti þeim í samráði við framkvæmdaraðila. Í þeim tilvikum sem athugasemdir berast mjög seint, en áður en matsskýrsla liggur fyrir, áframsendir Skipulagsstofnun athugasemdir til framkvæmdaraðila sem gefst þá kostur á að fjalla um þær í matsskýrslu.
Frá árinu 2011 hefur Skipulagsstofnun gefið út 42 álit um mat á umhverfisáhrifum. Samtals komu 293 athugasemdir við frummatsskýrslur á tímabilinu. Stysti tími sem leið frá upphafi kynningartíma þar til Skipulagsstofnun barst athugasemd var sex dagar. Í tilfelli sjö framkvæmda komu athugasemdir að kynningartíma loknum. Í eftirfarandi töflu má sjá hversu löngu síðar þær bárust:
Kynningartíma lauk | Athugasemd barst |
16. febrúar | 19. febrúar |
26. nóvember | 1. desember |
26. mars | 30. apríl |
6. janúar | 7. janúar og 10. febrúar |
3. maí | 10. maí og 29. maí |
21. september | 28. september |
6. september | 25. september |
Í tveimur tilvikum, frá upphafi árs 2011, bárust athugasemdir 35 dögum eftir að kynningartíma lauk. Þar af leiðandi er lengsti tími sem liðið hefur á milli þess að frummatsskýrsla hefur verið lögð fram til kynningar og athugasemd berst sex vikur og 35 dagar, þ.e. 77 dagar.