Ferill 589. máls. Aðrar útgáfur af skjalinu: PDF - Word Perfect.

---

149. löggjafarþing 2018–2019.
Þingskjal 1486  —  589. mál.

Svar

fjármála- og efnahagsráðherra við fyrirspurn frá Smára McCarthy um hugbúnaðarkerfið skattur.is.

     1.      Hver er formlegur eigandi höfundarréttar að hugbúnaðarkerfinu skattur.is?
    Ríkisskattstjóri er formlegur eigandi höfundarréttar að forritunarkóðanum.

     2.      Hver er heildareignarhaldskostnaður ríkisins af hugbúnaðarkerfinu skattur.is, sundurliðað eftir upprunalegum þróunarkostnaði, viðhaldskostnaði og kostnaði við útvíkkun á eiginleikum?
    Í meðfylgjandi töflu má sjá upplýsingar um viðhaldskostnað og kostnað við útvíkkun á eiginleikum. Fjárhæðir eru á verðlagi hvers árs í þús. kr. Ekki eru fyrirliggjandi upplýsingar um upprunalegan þróunarkostnað kerfisins.

	2013	2014	2015	2016	2017	2018
Viðhaldskostnaður	14.315	25.508	28.037	21.735	23.801	28.410
Þróunarkostnaður	18.298	9.531	17.880	20.327	14.425	21.167
	32.613	35.038	45.917	42.063	38.226	49.577

     3.      Hvers vegna hefur kóðinn að hugbúnaðinum ekki verið gefinn út opinberlega, í samræmi við stefnu stjórnvalda um frjálsan og opinn hugbúnað?
    Hugbúnaðarkerfið skattur.is hefur verið þróað og smíðað í samvinnu ríkisskattstjóra og hugbúnaðarbirgja, aðallega Advania/Skýrr. Kerfið er að langstærstum hluta sérsmíði þar sem slíkt kerfi er ekki í boði á markaði, hvorki sem séreignarhugbúnaður né frjáls og opinn hugbúnaður. Hugbúnaðarkerfið skattur.is byggist að langmestu leyti á sérsmíðuðum hugbúnaði sem eingöngu ríkisskattstjóri getur notað. Því hefur kóðinn að hugbúnaðinum ekki verið gefinn út opinberlega.

     4.      Er auðkenningarkerfi notað til að stýra aðgangi að hugbúnaðinum og ef svo er, hvert er það kerfi?
    Auðkenningarkerfi er notað til að stýra aðgangi að þjónustusíðu ríkisskattstjóra. Notendur geta auðkennt sig annars vegar með veflykli ríkisskattstjóra og hins vegar með rafrænum skilríkjum annaðhvort á korti eða í síma. Veflyklakerfi ríkisskattstjóra er sérsmíðað fyrir ríkisskattstjóra og samanstendur af almennum veflykli, skilalykli fagaðila og skilalyklum staðgreiðslu og virðisaukaskatts.
     Almennir veflyklar: Allir framtalsskyldir einstaklingar og félög eiga almenna veflykla. Veflykill er aðgangsorð fyrir rafræn samskipti framteljenda við skattyfirvöld á þjónustusíðunni skattur.is. Þar er hægt að skila skattframtali, auk þess sem margs konar önnur þjónusta er í boði. Veflyklarnir eru gefnir út af ríkisskattstjóra. Auk aðallykilsins eiga allir lykil sem heitir Skilalykill fagaðila.
     Veflyklar fyrir staðgreiðslu og VSK: Rafræn skil á staðgreiðslu opinberra gjalda og virðisaukaskatti eru möguleg bæði á þjónustuvefnum skattur.is og með sendingum beint úr launa- og bókhaldskerfum. Veflyklar fyrir staðgreiðslu og virðisaukaskatt eru „yfirlyklar“ og hvorki er hægt að breyti virkni þeirra né eyða þeim. Sá sem er með staðgreiðslulykil getur skilað staðgreiðslu og skoðað öll staðgreiðsluskil framteljanda á þjónustusíðu hans, án tillits til þess hver skilaði upplýsingunum og á hvaða lykli. Staðgreiðslulykill veitir einungis aðgang að þeim gögnum sem skilað var með honum í gagnaskilum (launamiðar, verktakamiðar o.s.frv.). Sams konar takmarkanir gilda um virðisaukaskattslykilinn.