Ferill 595. máls. Aðrar útgáfur af skjalinu: PDF - Word Perfect.
149. löggjafarþing 2018–2019.
Þingskjal 1615 — 595. mál.
Svar
heilbrigðisráðherra við fyrirspurn frá Smára McCarthy um hugbúnaðarkerfið Veru.
1. Hver er formlegur eigandi höfundarréttar að hugbúnaðarkerfinu Veru?
Upplýsingatæknifyrirtækið Origo hf. er eigandi höfundarréttar að hugbúnaðinum Veru. Embætti landlæknis hefur hins vegar tryggt ótakmarkaðan notkunarrétt fyrir hugbúnaðinn fyrir alla veitendur heilbrigðisþjónustu á Íslandi og nýtir hann með því að reka mínar síður á vefsvæðinu heilsuvera.is. Notkunin er veitendum heilbrigðisþjónustunnar og sjúklingum að kostnaðarlausu.
2. Hver er heildareignarhaldskostnaður ríkisins af hugbúnaðarkerfinu Veru, sundurliðað eftir upprunalegum þróunarkostnaði, viðhaldskostnaði og kostnaði við útvíkkun á eiginleikum?
Upphafleg greiðsla embættisins fyrir notkunarrétt á Heilsuveru var 7 millj. kr. Embættið greiðir Origo hf. 286 þús. kr. í notkunar- og viðhaldsgjöld á mánuði. Í eftirfarandi töflu má sjá það fjármagn sem hefur verið nýtt til þróunar á margs konar nýrri virkni í mínum síðum á heilsuvera.is:
| 2015 | 6.147.982 kr. |
| 2016 | 7.912.965 kr. |
| 2017 | 19.595.315 kr. |
| 2018 |
35.907.313 kr.
|
3. Hvers vegna hefur kóðinn að hugbúnaðinum ekki verið gefinn út opinberlega, í samræmi við stefnu stjórnvalda um frjálsan og opinn hugbúnað?
Frumkóðinn að hugbúnaðinum er í eigu Origo hf. og þess vegna ekki mögulegt að gefa hann út opinberlega.
4. Er auðkenningarkerfi notað til að stýra aðgangi að hugbúnaðinum og ef svo er, hvert er það kerfi?
Mínar síður á heilsuvera.is nýta sér innskráningarþjónustu island.is með kröfu um notkun rafrænna skilríkja vegna þess hve viðkvæm gögn eru aðgengileg á vefsvæðinu.
