Ferill 380. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 476 — 380. mál.
Fyrirspurn
til ferðamála-, iðnaðar- og nýsköpunarráðherra um frumkvöðla og hugvitsfólk.
Frá Ásmundi Friðrikssyni.
1. Hefur ráðherra kynnt sér niðurstöður úr viðamikilli könnun sem gerð var af Umbótastofnuninni í Stokkhólmi um að einungis 20% hugmynda frumkvöðla og hugvitsfólks komi frá háskólaumhverfinu, 47% frá einstaklingum á vegum fyrirtækja og 33% frá óháðum einstaklingum? Telur ráðherra að svipuð staða sé hér á landi?
2. Hvernig skiptist opinber stuðningur við þessa hópa hér? Hvernig er t.d. háttað styrkveitingu ríkisins vegna nýsköpunar frjálsra félagasamtaka í ljósi þess að ráðuneytið hefur nú hafnað öllum fjárstuðningi við Samtök frumkvöðla og hugvitsmanna (SFH) og Félag kvenna í nýsköpun (KVENN)?
3. Hver er afstaða ráðherra til „Svartrar skýrslu um nýsköpun“ sem SFH og KVENN gáfu út í apríl 2019?
4. Hafa konur á meðal frumkvöðla og hugvitsfólks notið sérstaks stuðnings og hvernig hefur sá stuðningur skipst á milli hópa?
5. Til hvaða félaga og félagasamtaka frumkvöðla og hugvitsfólks er og verður leitað til vegna þátttöku í
a. stýrihópi um mótun nýsköpunarstefnu,
b. Vísinda- og tækniráði,
c. ráðgjafarnefnd Nýsköpunarmiðstöðvar Íslands,
d. stjórn eða fagráði Tækniþróunarsjóðs,
e. fyrirhuguðu nýsköpunar- og frumkvöðlaráð,
f. stofnsetningu fyrirhugaðs safns nýsköpunar og tækniþróunar,
g. undirbúningi þeirra breytinga á Vísinda- og tækniráði, Nýsköpunarmiðstöð Íslands og sjóðakerfi nýsköpunar sem boðaðar eru í nýsköpunarstefnu fyrir Ísland?
6. Er fyrirhugað að gera þjónustusamninga við frjáls félagasamtök á sviði nýsköpunar um samfélagsverkefni verði eftir því leitað?
Skriflegt svar óskast.
