Ferill 137. máls. Aðrar útgáfur af skjalinu: PDF - Word Perfect.

---

150. löggjafarþing 2019–2020.
Þingskjal 526  —  137. mál.

Svar

ferðamála-, iðnaðar- og nýsköpunarráðherra við fyrirspurn frá Albertínu Friðbjörgu Elíasdóttur um varaaflsstöðvar.

    Fyrirspurnin hljóðar svo:
     1.      Hversu mikla olíu hafa allar varaaflsstöðvar raforku á Íslandi notað árlega síðastliðin tíu ár?
    Samkvæmt upplýsingum frá Orkustofnun eru ekki til frumgögn um raunnotkun eldsneytis varaaflsstöðva. Hins vegar er raforkuframleiðsla slíkra stöðva skráð. Með ákveðnum skekkjumörkum er hægt að bakreikna áætlaða olíunotkun varaaflsstöðva og aðra raforkuframleiðslu sem framleidd er með eldsneyti. Við útreikning er miðað við að 0,3 lítra af dísileldsneyti þurfi til að framleiða hverja kílóvattstund. Sú tala er áætlað meðaltal fyrir allar stöðvar en hún getur verið mismunandi eftir uppsettu rafafli, viðhaldi, aldri og keyrsluálagi hverju sinni.
    Í töflu 1 eru gögn um rafmagnsframleiðslu og áætlaða eldsneytisnotkun varaaflsstöðva og annarra aflstöðva sem ganga fyrir jarðefnaeldsneyti. Aðrar aflstöðvar í töflunni eru þær sem sjá Flatey, Grímsey og Grímsstöðum á Fjöllum fyrir raforku.

	Varaaflsstöðvar		Aðrar aflstöðvar knúnar jarðefnaeldsneyti		Samtals
	kWh	Lítrar	kWh	Lítrar	kWh	Lítrar
2009	1.316.033	394.810	1.037.062	311.119	2.353.095	705.929
2010	642.136	192.641	1.046.724	314.017	1.688.860	506.658
2011	1.014.175	304.253	1.089.463	326.839	2.103.638	631.091
2012	1.743.322	522.997	1.095.886	328.766	2.839.208	851.762
2013	1.613.499	484.050	1.136.556	340.967	2.750.055	825.017
2014	1.307.000	392.100	1.083.613	325.084	2.390.613	717.184
2015	2.824.507	847.352	1.072.684	321.805	3.897.191	1.169.157
2016	1.637.980	491.394	1.045.027	313.508	2.683.007	804.902
2017	1.175.057	352.517	910.299	273.090	2.085.356	625.607
2018	821.392	246.418	1.053.344	316.003	1.874.736	562.421
Samtals	14.095.101	4.228.530	10.570.658	3.171.197	24.665.759	7.399.728

     2.      Hvert hefur verið magn útblásturs frá sömu varaaflsstöðvum yfir sama tímabil?
    Stöðluð gildi um orkuinnihald og losun koltvísýrings á orkueiningu frá varaaflsstöðvum gefa niðurstöður sem birtar eru í töflu 2. Eftirfarandi tölur eru frá Orkustofnun.

	Varaaflsstöðvar	Aðrar aflstöðvar knúnar jarðefnaeldsneyti	Samtals
	Tonn CO2	Tonn CO2	Tonn CO2
2009	1.053	830	1.884
2010	514	838	1.352
2011	812	872	1.684
2012	1.395	877	2.273
2013	1.292	910	2.201
2014	1.046	867	1.914
2015	2.261	859	3.120
2016	1.311	837	2.148
2017	941	729	1.669
2018	657	843	1.501
Samtals	11.283	8.461	19.744

    
     3.      Kemur til álita að nýta lífdísil í stað jarðefnaeldsneytis til að keyra varaaflsstöðvarnar?
    Til þessa hefur lífdísill ekki verið notaður í stað jarðefnaeldsneytis til að keyra varaaflsstöðvar. Í þeirri vinnu sem nú stendur yfir við orkuskipti er þetta hins vegar eitt af þeim atriðum sem eru til nánari skoðunar. Það eru ákveðnir þættir sem þarf að skoða vel áður en farið er að nota lífdísil á varaaflsvélar og má þar nefna að lífdísill storknar við lægra hitastig en venjuleg dísilolía þannig að geymslutankar þyrftu að vera einangraðir og útbúnir með hitunarbúnaði til að tryggja gott flæði. Lífdísill hefur einnig talsvert styttra geymsluþol en venjuleg olía og getur tekið í sig vatn úr lofti og örveruvöxtur er meira vandamál í lífdísil en annarri olíu.

     4.      Hvaða leiðir telur ráðherra heppilegar til að draga úr olíunotkun varaaflsstöðva raforku?
    Varanlegasta leiðin til að draga úr olíunotkun varaaflsstöðva raforku er að auka raforkuframleiðslu á þeim svæðum sem eru útsett fyrir varaafli, samhliða úrbótum á flutningskerfi raforku. Sem dæmi má nefna að örugg tenging nýrra virkjana á Vestfjörðum inn á hringtengt raforkukerfi innan Vestfjarða myndi þýða mun minni keyrslu á varaafli á því svæði. Aðrar leiðir til að draga úr olíunotkun varaaflsstöðva, þ.m.t. notkun lífdísils, eru til nánari skoðunar í starfshópi ráðuneyta um orkuskipti samanber framangreint.