Ferill 529. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 1115 — 529. mál.
2. umræða.
Nefndarálit
um frumvarp til laga um brottfall ýmissa laga (úrelt lög).
Frá efnahags- og viðskiptanefnd.
Nefndin hefur fjallað um málið og fengið á sinn fund Harald Steinþórsson frá fjármála- og efnahagsráðuneyti. Nefndinni barst umsögn um málið frá Samtökum atvinnulífsins.
Með frumvarpinu er lagt til að á fjórða tug laga sem hafa lokið hlutverki sínu og ekki verður missir af falli brott úr lagasafninu. Um mat á áhrifum frumvarpsins segir í greinargerð með því að samþykkt þess hefði „ þau ein áhrif að auka skýrleika lagasafnsins að því er varðar lög á verksviði fjármála- og efnahagsráðuneytisins“. Nefndin telur jákvætt að ráðuneyti leggi sig fram um að auka skýrleika lagasafnsins með þessum hætti. Bendir nefndin í þessu samhengi á 23. gr. laga um breytingu á ýmsum lögum varðandi leyfisveitingar (einföldun regluverks) sem nýlega voru samþykkt á Alþingi þar sem 16 lög á sviði atvinnuvega- og nýsköpunarráðuneytis fengu að fjúka. Nefndin bendir enn fremur á frumvarp til laga um brottfall laga sem tvívegis hefur verið lagt fram, sbr. nú síðast 180. mál á 149. löggjafarþingi, sem líta mætti til við frekara hreinsunarstarf.
Nefndin leggur til að frumvarpið verði samþykkt óbreytt.
Alþingi, 12. mars 2020.
Óli Björn Kárason, form. |
Brynjar Níelsson, frsm. |
Þorsteinn Víglundsson. |
Bryndís Haraldsdóttir. | Oddný G. Harðardóttir. | Ólafur Þór Gunnarsson. |
Smári McCarthy. | Þorgrímur Sigmundsson. | Willum Þór Þórsson. |