Ferill 798. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 1552 — 798. mál.
Svar
heilbrigðisráðherra við fyrirspurn frá Birni Leví Gunnarssyni um lögbundin verkefni Sjúkrahússins á Akureyri.
1. Hvaða lögbundnu verkefnum sinnir Sjúkrahúsið á Akureyri?
Lögbundið hlutverk Sjúkrahússins á Akureyri er skilgreint í lögum um heilbrigðisþjónustu, nr. 40/2007. Í 21. gr. laganna er kveðið á um að hlutverk þess sé að:
a. veita heilbrigðisþjónustu sem á hverjum tíma samræmist skyldu slíks sjúkrahúss, m.a. sérfræðiþjónustu í helstu greinum læknisfræði, hjúkrunarfræði og eftir atvikum öðrum greinum heilbrigðisvísinda sem stundaðar eru hér á landi, með aðgengi að stoðdeildum og rannsóknadeildum,
b. annast starfsnám háskólanema í heilbrigðisvísindagreinum við Háskólann á Akureyri,
c. taka þátt í starfsnámi annarra háskólanema og framhaldsskólanema í grunn- og framhaldsnámi á heilbrigðissviði í samvinnu við Landspítala, Háskóla Íslands og aðrar heilbrigðisstofnanir og skóla,
d. stunda vísindarannsóknir á heilbrigðissviði,
e. gera fagfólki kleift að sinna fræðastörfum við Háskólann á Akureyri eða eftir atvikum aðra háskóla,
f. vera varasjúkrahús Landspítala.
2. Hver er áætlaður heildarkostnaður lögbundinna verkefna Sjúkrahússins á Akureyri og hver er áætlaður kostnaður hvers verkefnis samkvæmt fjárlögum fyrir árið 2020?
Heildarfjárveiting til Sjúkrahússins á Akureyri samkvæmt fylgiriti fjárlaga 2020 eru 8.449,7 millj. kr. að frádregnum sértekjum að fjárhæð 837,2 millj. kr. Fjárveitingar eru ekki sundurliðaðar eftir lögbundnum verkefnum stofnana í fjárlögum. Eftirfarandi skipting niður á viðföng kemur fram í fylgiriti með fjárlögum:
| 08-358 | Sjúkrahúsið á Akureyri | 8.449,7 |
| 08-358.101 | Sjúkrahúsið á Akureyri | 8.241,8 |
| 08-358.601 | Tæki og búnaður | 207,9 |
