Ferill 440. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 1719 — 440. mál.
Svar
fjármála- og efnahagsráðherra við fyrirspurn frá Ólafi Ísleifssyni um auknar skuldbindingar Lífeyrissjóðs starfsmanna ríkisins vegna laga um eftirlaun forseta Íslands, ráðherra, alþingismanna og hæstaréttardómara.
Fyrirspurnin hljóðar svo:
1. Hversu mikið jukust skuldbindingar Lífeyrissjóðs starfsmanna ríkisins, samkvæmt viðmiðum hans um tryggingafræðilegar úttektir, vegna áhrifa gildistöku laga um eftirlaun forseta Íslands, ráðherra, alþingismanna og hæstaréttardómara, nr. 141/2003, á lífeyrisrétt ráðherra annars vegar og hins vegar alþingismanna sem í störfum voru við gildistöku laganna?
2. Hversu mikið jókst skuldbinding sjóðsins vegna ráðherra og alþingismanna sem látið höfðu af störfum?
3. Hver var meðaltalshækkun á rétti til mánaðarlegs lífeyris við starfslok ráðherra annars vegar og hins vegar alþingismanna sem sæti áttu á Alþingi við gildistöku laganna?
4. Hver var fjárhagslegur ávinningur þingmanna og ráðherra sem sátu á þingi eða í ríkisstjórn við samþykkt umræddra laga 15. desember 2003 af setningu þeirra, reiknað sem réttur til aukins mánaðarlegs lífeyris? Þess er farið á leit að þessi ávinningur verði annars vegar tilgreindur sem meðaltal fyrir hópinn en hins vegar greindur í tíundir eftir fjárhæðum.
Ráðuneytið fékk Talnakönnun hf. til að reikna út fyrir sig umræddar skuldbindingar og réttindi ráðherra og alþingismanna við gildistöku laga nr. 141/2003 og byggist svarið á þeim upplýsingum.
Í fyrirspurninni er spurt um breytingar á skuldbindingum Lífeyrissjóðs starfsmanna ríkisins (LSR) en skuldbindingar þessar eru á ábyrgð ríkissjóðs en ekki lífeyrissjóðsins og miðast svarið við það.
Fyrir setningu laga nr. 141/2003 var ljóst að alþingismanna- og ráðherradeildir innan LSR stóðu ekki undir þeim skuldbindingum sem þær áttu að bera með þáverandi iðgjaldafyrirkomulagi. Ekki virtist gerlegt að gera breytingu þar á nema með miklu framlagi ríkissjóðs og stórhækkuðu iðgjaldahlutfalli. Alþingismanna- og ráðherradeildir voru í raun og veru hreinir gegnumstreymissjóðir úr ríkissjóði. Því var með lögum nr. 141/2003 lagt til grundvallar að falla frá sjóðsmyndun um eftirlaunaskuldbindingar fyrir alþingismenn og ráðherra, svo og aðra sem lögin tóku til, en taka þess í stað upp gegnumstreymiskerfi. Slíkt kerfi gilti á þeim tíma um forseta Íslands og hæstaréttardómara og því þótti rétt að fella saman í ein lög eftirlaunakerfi fyrir æðstu handhafa ríkisvalds. Breytingin með lögum nr. 141/2003 fól því í sér að árlegar greiðslur eftirlauna voru greiddar úr ríkissjóði í stað LSR og eftirlaunadeildir alþingismanna og ráðherra innan LSR voru lagðar niður. Forseti Íslands, ráðherrar, alþingismenn og hæstaréttardómarar greiddu af launum sínum eins og aðrir launþegar í A-deild LSR og mynduðu þannig þar almennan lífeyrisrétt samkvæmt lögum um sjóðinn og komu greiðslur samkvæmt lögum um LSR til frádráttar greiðslum úr ríkissjóði. Í ljósi þess að réttur samkvæmt lögum nr. 141/2003 var nokkru betri en almennt tíðkaðist var iðgjaldahlutfallið hækkað úr 4% af föstum launum í 5% af heildarlaunum.
Með lögum nr. 12/2009 voru lög nr. 141/2003 afnumin með sólarlagsákvæði fyrir þáverandi forseta Íslands og þá aðila sem voru í störfum hæstaréttardómara við gildistöku laga nr.12/2009. Fyrir gildistöku laga nr. 141/2003 voru hæstaréttardómarar hins vegar sjóðfélagar í LSR, A-eða B-deild, en eftir gildistöku laganna urðu síðar skipaðir dómarar sjóðfélagar í A-deild LSR. Þar sem forseti Íslands, ráðherrar og alþingismenn eru ekki starfsmenn ríkisins í skilningi laga nr. 70/1996, um réttindi og skyldur starfsmanna ríkisins, var með lögum nr. 12/2009 gerð sú breyting á lögum nr. 1/1997, um Lífeyrissjóð starfsmanna ríkisins, að þeim var bætt sérstaklega við upptalningu sjóðfélaga í 3. gr. laga nr. 1/1997. Frá og með gildistöku laga nr. 12/2009 hafa því gilt sömu reglur um þessa aðila og samkvæmt lögum nr. 1/1997.
Í svarinu er miðað við tryggingafræðilegar forsendur í árslok 2003.
Eftirfarandi tafla er svar við fyrstu tveimur liðum fyrirspurnarinnar:
Skb. ríkis fyrir lög (millj. kr.) | Skb. ríkis eftir lög (millj. kr.) | Hækkun (millj. kr.) |
|
Ráðherrar í des. 2003 | 239 | 431 | 192 |
Ráðherra, fyrrverandi í des. 2003 | 424 | 462 | 38 |
Alþingismenn í des. 2003 | 1.266 | 1.560 | 294 |
Alþingism., fyrrverandi í des. 2003 | 1.419 | 1.453 | 35 |
Eftirfarandi tafla er svar við lið 3:
Lífeyrir á mánuði (þús. kr.) fyrir lög | Lífeyrir á mánuði (þús. kr.) eftir lög | Hækkun | |
Ráðherrar í desember 2003 | 104,5 | 109,6 | 4,9% |
Alþingismenn í desember 2003 | 111,7 | 118,7 | 6,2% |
Í lið 4 er spurt um fjárhagslegan ávinning fyrir ráðherra og alþingismenn í desember 2003, annars vegar sem meðaltöl og hins vegar að ávinningurinn verði greindur í tíundir eftir fjárhæðum.
Meðaltalstölurnar koma fram í svari við lið 3.
Greining í tíundir var gerð þannig að lífeyrisávinnslu ráðherra var bætt við lífeyrisávinnslu þeirra sem alþingismanna og útkoman flokkuð í tíundir eftir fjárhæð réttindaávinnslu þeirra 63 einstaklinga sem sátu á þingi þegar lagabreytingin var samþykkt. Í meðfylgjandi töflu má sjá hvernig ávinnsla skiptist í tíundir:
Lífeyrir fyrir lög | Lífeyrir eftir lög | Mismunur (kr. á mánuði) | |
1 | 184.067 | 234.196 | 50.129 |
2 | 39.982 | 61.112 | 21.130 |
3 | 157.986 | 172.237 | 14.251 |
4 | 110.167 | 118.574 | 8.407 |
5 | 6.273 | 9.809 | 3.537 |
6 | 7.755 | 10.627 | 2.872 |
7 | 141.269 | 142.247 | 978 |
8 | 302.327 | 302.327 | 0 |
9 | 193.776 | 193.776 | 0 |
10 | 172.641 | 172.641 | 0 |