Ferill 889. máls. Aðrar útgáfur af skjalinu: PDF - Word Perfect.
150. löggjafarþing 2019–2020.
Þingskjal 1989 — 889. mál.
Svar
samgöngu- og sveitarstjórnarráðherra við fyrirspurn frá Maríu Hjálmarsdóttur um einbreiðar brýr.
Fyrirspurnin hljóðar svo:
Hyggst ráðherra beita sér fyrir því að verkefnum varðandi fækkun einbreiðra brúa verði flýtt þrátt fyrir að hönnunarvinnu sé ekki lokið? Ef svo er, með hvaða hætti?
Í aðgerðaáætlun samgönguáætlunar eru markmið og mælikvarðar sem miða að bættu umferðaröryggi. Eitt af forgangsmarkmiðum samgönguáætlunar er fækkun einbreiðra brúa á umferðarmestu vegum landsins.
Vegagerðin lætur vinna áætlun um forgangsröðun nýrra brúa þar sem einbreiðar brýr eru fyrir. Fyrst og fremst er tekið tillit til umferðar, burðargetu, aldurs og ástands, samfellu á leiðum auk sérstakra aðstæðna séu þær uppi.
Af 1.191 brú í þjóðvegakerfinu eru 677 einbreiðar, þar af voru 39 brýr á Hringveginum einbreiðar árið 2017. Í markmiðum samgönguáætlunar 2019–2023 var áherslan á að fækka einbreiðum brúm á vegum með yfir 200 bíla meðalumferð á dag allt árið og fækka þeim um níu á tímabilinu eða í 30 árið 2023.
Markmiðin voru endurskoðuð í endurbættri samgönguáætlun 2020–2024 sem lögð var fyrir Alþingi í byrjun desember 2019 og fjármagni bætt í frá fyrri áætlun til að auka umferðaröryggi. Í samgönguáætlun er gert ráð fyrir 2.500 millj. kr. framlagi á næstu fimm árum til fækkunar einbreiðra brúa með markmiði að einbreiðar brýr á Hringvegi verði 22 árið 2024.
Þessu til viðbótar þá er gert ráð fyrir sérstöku framlagi í tengslum við fjárfestingarátak 2020 að fjárhæð 3.300 millj. kr. til að breikka einbreiðar brýr á næstu tveimur árum. Samtals er því áformað að verja um 5.800 millj. kr. á næstu fimm árum til fækkunar á einbreiðum brúm.
Hér er efni sem sést aðeins í pdf-skjalinu.
Alls eru fjórar brýr í byggingu, sem voru boðnar út árið 2019, sem munu leysa af hólmi einbreiðar brýr á Hringvegi 1:
– Brú á Brunná austan við Kirkjubæjarklaustur (2020)
– Brú á Kvíá í Öræfasveit (2020)
– Brú á Fellsá í Suðursveit (2020)
– Brú á Steinavötn í Suðursveit (2021)
Unnið er að því að alls sex brýr á Hringvegi verði breikkaðar til viðbótar á tímabilinu 2021–2024 miðað við fyrirhugaðar fjárveitingar til breikkunar brúa. Þær eru:
– Hverfisfljót (2021)
– Búlandsá
– Gjádalsá
– Hvaldalsá
– Selá í Álftafirði
– Krossá á Berufjarðarströnd
Í fjárfestingarátaki 2020–2022 verða þessar sjö einbreiðu brýr breikkaðar:
– Hringvegur um Núpsvötn
– Stóra-Laxá á Skeiða- og Hrunamannavegi
– Bjarnadalsá í Önundarfirði á Vestfjarðavegi
– Botnsá í Tálknafirði á Bíldudalsvegi
– Hringvegur um Skjálfandafljót
– Köldukvíslargil á Norðausturvegi
– Gilsá á Völlum á Skriðdals- og Breiðdalsvegi
Margar brýr eru jafnframt tilgreindar sem sérstök verkefni eða hluti af öðrum verkefnum í 5 ára samgönguáætlun. Séu tekin dæmi um slíkar framkvæmdir úr samgönguáætlun 2020– 2024 má nefna:
– Hattardalsá á Djúpvegi (2020)
– Jökulsá á Sólheimasandi 2021
– Hringvegur um Hornafjörð 2021–2024 (3 brýr)
– Vestfjarðavegur um Gufudalssveit 2020–2023 (4 brýr)
– Vestfjarðavegur um Dynjandisheiði 2020–2024 (7 brýr)
– Þverárfjallsvegur og Skagastrandarvegur um Laxá 2021–2023 (1 brú)
Enn fleiri eru síðan á 2. og 3. tímabili 15 ára samgönguáætlunar.
Verk hefjast með undirbúningi, skipulagsbreytingum og hönnun nokkru áður en til eiginlegra framkvæmda kemur. Á því tímabili verka undirbýr Vegagerðin verkefnin þannig að þau séu tilbúin er framkvæmdir eiga að hefjast. Það gerir stofnunin í samræmi við hvenær framkvæmdir eru fyrirhugaðar í samgönguáætlun. Þegar áætlunum er breytt og ákveðið að fara í tilteknar framkvæmdir fyrr en áður var fyrirhugað geta áætlanir riðlast. Þær þarf þá að endurskoða og breyta þannig að tími verði fyrir alla verkþætti allt frá hönnun, undirbúningsrannsóknum, skipulagsbreytingum o.s.frv.
