Ferill 74. máls. Aðrar útgáfur af skjalinu: PDF - Word Perfect.
151. löggjafarþing 2020–2021.
Þingskjal 246 — 74. mál.
Svar
sjávarútvegs- og landbúnaðarráðherra við fyrirspurn frá Ingu Sæland um rannsóknir á skeldýrum.
1. Hversu miklum fjármunum varði Hafrannsóknastofnun árlega til skeldýrarannsókna á árunum 2015–2020?
Leitað var upplýsinga hjá Hafrannsóknastofnun og byggjast svörin á þeim upplýsingum.
Rannsóknir og vöktun á nytjastofnum, þ.m.t. á skeldýrum, er stór þáttur í starfsemi Hafrannsóknastofnunar á hverju ári. Spurningunni er svarað út frá nytjastofnum skeldýra, þ.e. hörpudisk, kúfskel, kræklingi og beitukóngi.
Stofnmælingaleiðangrar á hörpudisk eru aðgreindir í verkbókhaldi Hafrannsóknastofnunar en í þeim er einnig safnað upplýsingum um aðra þætti vistkerfisins. Gögn sem safnað er sem hluta af vöktun, t.d. í stofnmælingum og afla, eru þannig nýtt til mats á afrakstursgetu hörpudisks en nýtast jafnframt til grunnrannsókna á líffræði, vistfræði, erfðafræði hörpudisks sem og til vísindarannsókna á veiðistjórnarkerfum. Ekki var farið í eiginlega rannsóknarleiðangra til könnunar á beitukóngi eða kúfskel á tímabilinu 2015–2020.
Miðað við uppbyggingu verkefnabókhalds Hafrannsóknastofnunar er ekki hægt að svara með beinum hætti hversu miklum fjármunum var varið til skeldýrarannsókna á árunum 2015–2020.
2. Hvaða verkefni sem lúta að rannsóknum á skeldýrum hafa verið unnin á þessu árabili og hve miklir fjármunir voru veittir í hvert verkefni?
Líkt og kemur fram í svari við 1. tölul. fyrirspurnarinnar er uppbygging verkefnabókhalds Hafrannsóknastofnunar ekki þannig að hægt sé að svara með beinum hætti hversu miklum fjármunum var varið til skeldýrarannsókna. Hér á eftir eru talin upp þau verkefni sem unnið var að á árunum 2015–2020 og voru hluti af vöktun og rannsóknum á skeldýrum ásamt árlegri kostnaðaráætlun stofnunarinnar.
| Verkefni | Markmið | Kostnaður |
| Hörpuskel | Mat á veiðiþoli hörpudisks í Breiðafirði | 2016: 13.980.000 2017: 14.298.000 2018: 14.300.000 2019: 15.315.000 2020: 14.690.000 |
| Rannsóknir á hryggleysingjum | Grunnrannsóknir á líffræði og vistfræði hryggleysingja , þ.m.t. á kræklingi, kúfskel , hörpudisk og beitukóngi | 2018: 30.624.020 2019: 19.700.000 2020: 17.125.000 |
3. Hversu margar ritrýndar greinar um skeldýr eftir sérfræðinga Hafrannsóknastofnunar hafa birst í alþjóðlegum vísindaritum á framangreindu árabili, hver er titill greinanna og hvar birtust þær?
Á árunum 2015 til og með 2020 birtist ein ritrýnd grein í alþjóðlegum tímaritum um skeldýr (beitukóng). Tilvísun í greinina er hér:
Woods P., and Jonasson, J.P. (2017). Bayesian hierarchical surplus production model of the common whelk Buccinum undatum in Icelandic waters. Fisheries Research 194, 117–128.
