Ferill 199. máls. Aðrar útgáfur af skjalinu: PDF - Word Perfect.

---

151. löggjafarþing 2020–2021.
Þingskjal 435  —  199. mál.

Svar

umhverfis- og auðlindaráðherra við fyrirspurn frá Þorsteini Sæmundssyni um landshlutaverkefni í skógrækt.

     1.      Hversu margir samningar eru í gildi við landeigendur um skógrækt, skipt eftir landshlutum, og hver er gildistími þeirra?
    Skógrækt á lögbýlum (áður landshlutaverkefni í skógrækt) er samstarf ríkisins við eigendur lögbýla um fjölnytjaskógrækt. Allir samningar frá og með árinu 2006 eru með 40 ára gildistíma. Eldri samningar með 10 ára gildistíma eru allir fallnir úr gildi og er elsti samningurinn frá 1998 með gildistíma til 2038. Fjöldi samninga sem í gildi eru, skipt eftir landshlutum, er eftirfarandi:

Landshluti	Fjöldi samninga	Fjöldi jarða
Austurland	158	142
Norðurland	200	196
Suðurland	90	90
Vesturland	133	126
Vestfirðir	42	42
Samtals	623	596

     2.      Hverjir eru þeir aðilar sem hlut eiga að máli, einstaklingar eða félög? Listi óskast með nöfnum eigenda og heimilisföngum.
    Þeir aðilar sem skráðir eru fyrir samningi skiptast þannig:

Aðili	Fjöldi
Konur	70
Karlar	224
Tveir aðilar (hjón, systkin o.s.frv)	173
Fyrirtæki (oftast ehf.)	129
Alls	596

    Listi yfir nöfn jarða og samningsaðila samkvæmt upplýsingum frá Skógræktinni fylgir svari þessu.

     3.      Hver er heildarupphæð samninga hvert ár frá 2000 til 2019 á verðlagi ársins 2020?
    Meðfylgjandi tafla sýnir framlög til skógræktar á lögbýlum á verðlagi ársins 2020 fyrir tímabilið 2003–2020 en gögn vegna framlaga áranna 2000–2002 eru ekki aðgengileg þar sem skipt var um bókhaldskerfi hjá ríkinu árið 2003. Fyrir tímabilið 2003–2007 byggjast fjárhæðirnar á upplýsingum úr bókhaldi landbúnaðarráðuneytis, síðar sjávarútvegs- og landbúnaðarráðuneytis, og á færslum á tegundinni framlög til einstaklinga, samtaka og heimila. Fyrir tímabilið 2008–2020 byggjast fjárhæðirnar á gögnum frá Skógræktinni um framlög til landshlutaverkefnanna. Í öllum tilfellum er um framkvæmdafjármagn að ræða, ekki rekstur verkefnanna.

Ár	Heildarupphæð hvers árs (millj. kr.)	Heildarupphæð árs (millj. kr.) á verðlagi í október 2020
2003	134,4	287
2004	176,4	363
2005	225,5	444
2006	217,4	399
2007	328,2	577
2008	310,8	494
2009	258,6	367
2010	226,4	305
2011	221,8	287
2012	196,5	242
2013	218,0	258
2014	231,0	268
2015	219,0	250
2016	253,5	285
2017	222,8	246
2018	216,9	233
2019	238,3	249
2020	307,0	307*
*Sem hluta af fjárfestingarátaki ríkisstjórnarinnar til að sporna gegn niðursveiflu í efnahagslífinu í kjölfar heimsfaraldurs kórónuveirunnar var 20 millj. kr. varið til grisjunarverkefna í landshlutaverkefnum. Sú upphæð er ekki inni í þessari tölu.

    Í fjárlagafrumvarpi fyrir árið 2021 er gert ráð fyrir 392,7 millj. kr. framlagi til skógræktar á lögbýlum.



Fylgiskjal.

Nöfn jarða og samningsaðila.

www.althingi.is/altext/pdf/151/fylgiskjol/s0435-f_I.pdf