Ferill 313. máls. Aðrar útgáfur af skjalinu: PDF - Word Perfect.
151. löggjafarþing 2020–2021.
Þingskjal 761 — 313. mál.
2. umræða.
Nefndarálit með breytingartillögu
um frumvarp til laga um skipagjald.
Frá meiri hluta efnahags- og viðskiptanefndar.
Nefndin hefur fjallað um málið og fengið á sinn fund Guðrúnu Ingu Torfadóttur, Ingibjörgu Helgu Helgadóttur, Hlyn Ingason og Steinar Örn Steinarsson frá fjármála- og efnahagsráðuneyti.
Umsagnir bárust frá Samgöngustofu og Samtökum skipaiðnaðarins og Samtökum iðnaðarins.
Með frumvarpinu er lagt til að ný heildarlög um skipagjald öðlist gildi.
Í 2. mgr. 1. gr. er lagt til að Samgöngustofa fari með álagningu skipagjalds. Í umsögn stofnunarinnar er þess getið að eðlilegra kunni að vera að Skatturinn fari með álagningu gjaldsins. Nefndin óskaði eftir afstöðu Skattsins til framangreindra athugasemda. Í minnisblaði frá Skattinum kemur fram að í framkvæmd fari Samgöngustofa með álagningu gjaldsins þótt það sé ekki sérstaklega tilgreint í gildandi lögum, færir Skatturinn tæknileg rök fyrir óbreyttu fyrirkomulagi. Með vísan til þess telur meiri hlutinn framangreindar ábendingar Samgöngustofu ekki gefa tilefni til breytinga á framkvæmdinni.
Breytingartillögur meiri hlutans eru tæknilegs eðlis og þarfnast ekki skýringa.
Að framangreindu virtu leggur meiri hlutinn til að frumvarpið verði samþykkt með eftirfarandi
BREYTINGU:
1. Í stað orðanna „Gjöldin skulu miðuð“ í 3. mgr. 1. gr. komi: Gjald skal miðað.
2. Í stað 1. og 2. málsl. 3. gr. komi einn nýr málsliður, svohljóðandi: Innheimtumenn ríkissjóðs annast innheimtu skipagjalds og skulu þeir skila því í ríkissjóð.
Alþingi, 15. janúar 2021.
Óli Björn Kárason, form. |
Brynjar Níelsson, frsm. | Jón Steindór Valdimarsson. | |
Bryndís Haraldsdóttir. | Oddný G. Harðardóttir. | Ólafur Þór Gunnarsson. | |
Smári McCarthy. | Willum Þór Þórsson. |